Serpîl Kemalbaye: Ganî ma problemê ciwîyayîşî yê cinîyan taloq nêkerî 

2020-02-04 09:24:57


	 

	
		
			
				
					
						
							Dîlan Babat
						
							ENQERE - Parlamentera HDPyî ya Îzmîrî Serpîl Kemalbaye, da zanayene ke hetkarîyê ke AKPyî serê mexdurîyetê binê nameyê ‘hetkarîya komelî de’ keno, feqîrî zêde keno û vat: “Problemê girîng, ewro yenê ciwîyayene. Hewcedarî esto ke problemê cinîyan nêrê taloqkerdene û ewro ra tepîya ma, rîyê ke eşkenê serê lingan de vinderê awan bikerî."
						
							Meclîsê Cinîyan ê HDPyî 18-19ê Çele de Enqere de bi sloganê, ‘Ma azadîye de bi israr ê, têkoşîn de bi qerar ê' konferans viraştî. Dimayê konferansî netîcename ame eşkerakerdene û netîce de awankerdişê butçeyê cinîyan, polîtîka û çareserîyê vera feqîrîyê cinîyan ca girewt.
						
							Parlamentera HDPyî ya Serpîl Kemalbaye, derheqê netîce de şîrove kerd.
						
							'Cinî hepsê keyeyî yenê kerdene'
						
							Serpîle da zanayene ke krîzê ekonomî, întîxar û çinbîyayîşê omidî resayo sewîyeyêka xidar û vat: "Barê nê tabloyê giran serê milê cinîyan de yo. Cinîyan eştê teberê îstîhdamî, tena seba welidnayene û barê keyeyî ameyê mehkumkerdene. AKP keda cinîyan bê erc keno, hepsê keyeyî keno, xozaya ci talan keno. Ma nê ciwîyayîşî qebûl nêkenê."
						
							'Ma do xebata xo zêde bikerê'
						
							Serpîle arde ziwan ke hewcedarî bi polîtîkayê ke cinî eşkenê cuya xo ya ekonomî bidest bikerê esto û wina vat: "Problemê girîng û lezabez estê. Ma nêeşkenê vajê ke dimayê nê îqtîdarî çareser bikerê. Ganî problemê ciwîyayîşî yê cinîyan nêrê taloqkerdene. Verê qeyûman îdarekerdene herêmî de, polîtîkayê ke cinî xurt kerdêne vistîbî ciwîyayene. La qeyûman hêrişê sazgeh, komel û koperatîfan kerd. Îqtîdar cinîyan sey tehdîd vîneno la ma do koperatîf, yewîneyê cinîyan awan bikerî."
						
							'Ganî ma tewr zêde însiyatîfan bigîrê’
						
							Serpîle da zanayene ke HDP partîyêka cinîyan a û wina vat: "Heta nika pêwa kêmîyê ma zaf ê zî ma zaf rayîr da pey xo. Semedo ke ma nê aver berê, ganî ma tewr zêde xo organîze bikerê û bi fikrê têduştî û azadîwaşt pêro xebatê partî aver berê. Ganî bi nê amancî, ma çimeyê xo seferber bikerî. Konferans de kêmayî nê het ra ameyî tespîtkerdene. Ganî ma tewr zêde însiyatîfan bigîrê.”
						
							Serpîle da zanayene ke, seba cinî sey kesê têduşt û azad komelî de ca bigîrê, hewcedarî bi polîtîkayê têduştî zayendî estê û vat piştdayîşê semedê însiyatîfê cinîyan do tewr zêde hêz bido cinîyan.