
Semedê dewaya Eylem Tîllere vengdayîşê hîsgêrî

2020-02-03 14:35:34


	&nbsp;

	RIHA - Deweya Eylem Tîllere ya ke ameye qetilkerdene de, di serre yo hema qerar nêameyo dayene. Avûkat Zeynep Dîlek Polate semedê roniştişê ke do 4ê Sibate de 4in Dadgeha Cezaya Giran ya bêro vînayene, vengdayîşê wayîrvejîyayîşê dewa kerd.

	&nbsp;

	Wêranşarê Rihayî de 12ê teşrîna verêne 2017ine de, cinîya bi nameyê Eylem Tîllere keyeyê xo de merde amebî vînayene û amebi îdiakerdene ke întîxar kerda. Serê gerrekerdene keyeyî de mêrdeyê aye Huseyîn Tîller ame destbendkerdene û tepiştene. 5in roniştişê dewaya Huseyîn Tîllerî 21ê teşrîna peyêne 2019an de 4in Dadgeha Cezaya Giran ya Rihayî de ame vînayene. Gumanbar Huseyîn Tîller, avûkatê ci Muharrem Tîller, Îsmaîl Alakuş, maya Huseyîn Tîllero ke bêtepiştene yena muhakemekerdene Hanî Tîller, avûkata aye Halîl Tuysuz û Sereka Komeleya Piştdayene Keyeyê Ciwîyayîşî yê Cinîyan û avûkata Eyleme, Zeynep Dîlek Polate û Mudûrîyê Xizmetê Komelî û Xebata ya Keyeyî Samet Koylu tewrê roniştişî bî.

	&nbsp;

	Gumanbar Huseyîn Tîllerî pawitişê xo yê verê reyna kerd û waştişê tahlîyeyê xo kerd.

	&nbsp;

	'Eyleme întîxar nêkerd, amî qetilkerdene'

	&nbsp;

	Avûkata Eyleme, Zeynep Dîlek Polate dîyar kerde ke goreyê îfadeyê şahidan, raporê krîmînal û raporê otopsîyê yê dosya de ca gênê, yeno vînayene ke maktul plankerde ameya kiştene û vat: "Eşkera yo ke cinîyêka ciwane, heqê aye ciwîyayîşî destê ci ra ameyo girewtene û ameya qetilkerdene. Roniştiş de hewl ameyo dayene ke maktul û keyeyê aye bêro muhakemekerdene û vera caardişê gumanbar, psîkolojîyê maktule û rewşa ci ya keyeyî ameya cigêrayîş. No zî yeno na mana ke mexdur yena sûcdarkerdene.

	&nbsp;

	Heto bîn ra delîlî zaf zelal vejîyenê meydan ke Eyleme întîxar nêkerdo, ameya qetilkerdene. Ma wazenê ke gumanbar bêrê cezakerdene û cezaya ey nêro vistene. Labelê bêcezaverdayîş û vistişê cezayan cesaret dano mêrdan. Semedê nê zî, cinî yenê qetilkerdene. Semedê bawerîya bi edeletî vindî nêbo û wijdanê komelî rehet bikero, ma wazenê ke gumanbar bi hawayêko tewr giran bêro cezakerdene.”

	&nbsp;

	Avûkatê gumanbar, Muharrem Tîllerî zî sey avûkatê xeylêk gumanbarê bîn, îdia kerd ke têkilîyê Eylem û keyeyî bi rêxistine dir esto û bi nê hewldayîşî waşt sûcê xo xelas bikerê. Avûkatê gumanbar her tewir waştişê tahlîleyê gumanbar zî kerd.

	&nbsp;

	Roniştiş siba yo

	&nbsp;

	Roniştişê dewa do 4ê Sibate de bêro vînayene. Avûkata Eyleme, Zeynebe semedê roniştişo ke 4ê Sibate de bêro vînayene, veng da pêro rêxistinê cinîyan û vat, ganî wayîrê dewa vejîyê.

	&nbsp;

	&nbsp;