'Ganî seba aştîye û têduştîye berpirsîyarî bêro girewtene'

2020-01-20 15:39:43


	 

	ENQERE - HDPyî bale ante ser ke îşxalê Efrînî de bi seyan kesî merdî, tecawuzî ameyî kerdene, dest nayîye malanê şarî ser.

	 

	Heyetê Rayberdişî yê HDPyî bi wesîleya serrgêra îşxalê Efrînî ewro eşkerayîyêka nuştekîye kerde.

	 

	Eşkerayîye de wina ame vatene: "Îşxalê Efrînî ra dima di serrî vîyartî. Goreyê rêxistinanê heqanê merdiman 20ê çeleyê 2018î ra nata Efrîn de 545 sivîlî merdî ke înan ra 50ê ci cinî yê û 670 kesî birîndar bîyî ke  300ê ci domanî û 270ê ci cinî yê. 60 cinîyî zî ameyî tecawuzkerdene.Bi se hezaran kurdî ameyî koçkerdene, hetê cerganê AKP û MHPyî ra dest nayîye mal û mulkanê înan. Xozayê Efrînî texrîbatêko pîl dî, zeytûnêrî ameyî talankerdene. Cayê tarîxîyî ameyî xerakerdene, eserê tarîxî ameyî diznayene. 42 cayê tarîxîyî, mekanê arkeolojîkî ameyî talankerdene û texrîbkerdene. Îqtîdaro ke wazeno Efrîn de ca bido selefîyan nika heman zulmê îşxalî Serêkanîyê û Girê Sipî de keno. 

	 

	Reyna eşkerayî de ame vatene ke cayanê ke ameyî îşxalkerdene de alaya tirkan yena dardekerdene û wina ame vatene: "Tabelayê bi tirkî yenê xebitnenê û erjê kurdan yenê çinkerdene, perwerde bi tirkî yeno dayene. Nê kerdişî mojnenê ke zîhnîyetê îqtîdarî asîmîlasyonker o. Îqtîdarê AKP-MHPyî nê prosesî de sere de kurdan pêro muxalîfanê şerî ser o teda kerde. Bi seyan kesî seba ke vat 'seba şerî ney' ameyî destbendkerdene û tepiştene.Îqtîdarê AKP-MHPyî nika zî Esad reyde pêvînayîşan keno ke kurdî nêbê wayîrêkê statuyî. Îqtîdarê AKP-MHPyî cade sere de Lîbya, Iraq û pêro Rojhelatê Mîyanênî de polîtîkaya îşxalî ra fek vera bido. Dişmenîya kurdan kesî rê fayde nêkena. Herinda şerî de ganî cografyaya haştîyane, azade, biedalete bêra awankerdene. Ma bi wesîleya serrgêra 2. ya îşxalê Efrînî venga rayaumûmîya Tirkîya û dinya danê ke vera îşxalê Efrînî û herêmanê bînan veng bikerê, bibê wayîrê tewirêkî."