
Sereştişê deweke de cinî ameyî kuwayene

2019-12-24 16:09:55


	&nbsp;

	ÇEWLÎG - Deweka Xişxişokî ya dewa Hasanova ya qezaya Kanîreşî ya Çewlîgî de leşkeran eşt keyeyan ser. Leşkeran zereyê keyeyêk kinit, talan kerd û şarê keyeyî kuwa.

	&nbsp;

	21ê kanûne de leşkeranê ke bi xeylêk wesayîtan ameyî dewa Hasanova eşt keyeyan ser. Leşkeran sereştişê bi îdîaya ”Deweke de gêrenî kesan” de dormeyê deweke zî girewte. Dewijan derheqê têgêrayîşanê leşkeran qalî kerd.

	&nbsp;

	Zereyê keyeyî ame kolnayene

	&nbsp;

	Dewijan pare kerd ke leşkeran sereştişan de keyeyî serûbin kerdî û xeylêk zerar da hacetanê înan. Leşkeran cigêrayîş de çîyêk nêdî. La leşkeran reyna zî seba ke cezaya ci ya tesdîqkerde esta binê keyeyê Zekî Sayako 85 serre bi îdîaya ”kampe esta” dest pê kinitişî kerd. Leşkeran hêrişê cinîyanê ke nêrazîbîyayîşê xo mojna rê kerd. Dewijan wina vat: “Leşkeran cinîyan rê ke nêwaştêne leşkerî keye bikinê heqaret kerd û cinîyî kuwayî. Lêhifî eşkawitî û ewnîyayî zereyê înan zî. Vatêne dewe de kesî estê ke ma gêrenê ci û ma rê persayêne ke nê kamca de yê. Ma zî vat ke ê dewe de nêciwîyenî. Xora teda ra dewe de kesêk nêmend. Têna çend kalî, cinîyî û domanî estî. Domanî ters verî ra lerzayêne û bermayêne. Leşkeran zanayêne ke ê kesî dewe de nîyê la seba ke îşkence bi keyeyan bikê eşte dewa ma ser.”

	&nbsp;

	Erzaq ame rijnayene

	&nbsp;

	Dewijanê ke warê koyan de ciwîyenê bala ante ser ke dewe ra şîyayîşê sûqî zaf zor o û wina dewam kerd: “Keyeyê ma de seba zimistanî erzaqê ma estbî. Leşkeran erzaqê ma raşayî. Ma nê zimistanî de do se bikê? Leşkeran cinîyan rê gef wend û vat ke eke kesê ke leşkerî gêrenê ci nêrê dewe, leşkerî do reyna bierzê dewe ser.”

	&nbsp;

	Ame vatene ke sereştiş de leşkeran dest na telefonanê mobîlan ê dewijan û tay telefonî zî şikitî. Dewijan venga dezgehanê heqanê merdiman û wekîlan da ke bêrê û keye de cigêrayîş bikê.&nbsp;