
Rayberî PKKyî Abdullah Ocalanî rê cezaya dîsîplînî dîya 

2019-12-18 12:29:21


	&nbsp;

	STENBOL - Vejîya werte ke Rayberê PKKyî Abdullah Ocalanî û hîrê tepişteyanê sîyasîyan yê Îmrali rê 21ê teşrîna verêne de cezayêka newîye ya dîsîplînî ameye dayene. Avûkatanê Abdullah Ocalanî da zanayene ke ceza yena nimnayene û ê tedeyê ceza nêzanenê.

	&nbsp;

	Pêvînayîşê Abdullah Ocalanî û Omer Hayrî Konar, Hamîlî Yildirim û Veysî Aktaş ê ke heman zindan de yê bi hawayêkê keyfî yenê astengkerdene. Goreyê xebera Ajansê Mezopotamya 21ê teşrîna verêne de Abdullah Ocalan û hîrê tepişteyî cezaya dîsîplînî girewte.

	&nbsp;

	'Di rey cezaya dîsîplînî dîya ci'

	&nbsp;

	Avûkatanê Buroyê Huqûqî yê Asirinî îbrahîm Bîlmezî vist vîrî ke 10ê temmuze de îdareyê zindanî cezaya dîsîplînî dabî Abdullah Ocalanî û tepişteyanê Îmraliyî. Îbrahîmî îfade kerd ke dima ke na ceza qedîyaye 21ê teşrîna verêne de cezayêka newîye ya dîsîplînî înan rê ameye dayene. Goreyê Îbrahîmî, Abdullah Ocalanî û tepişteyanê bînan zî îtîrazê cezaya dîsîplînî kerd.

	&nbsp;

	'Brêz Abdullah Ocalan zano ke qerar sîyasî yo'

	&nbsp;

	Îbrahîmî Ajansê Mezopotamya reyde qisey kerd û vat: "Seba ke Birêz Abdullah Ocalan vîneno nê cezayê dîsîplînî tewirêko sîyasî yê, ey zî tewirêko sîyasî mojna û îtîrazê cezayan kerd." Îbrahîmî eşkera kerd ke 29ê teşrîna peyêne de o pê cezaya dîsîplînî hesîya û Abdullah Ocalanî û tepişteyanê bînan îtîrazê cezaya dîsîplînî kerd labelê îtîrazê înan ameyî redkerdene.

	&nbsp;

	'Cezaya dîsîplînî ma ra nimnenê'

	&nbsp;

	Îbrahîmî va ke, cezaya dîsîplînî ya muwekîlanê ci yena nimnayene û naye ra ê nêzanenê ke tedeyê ceza çi yê. Îbrahîmî ard ziwan ke cezaya dîsîplînî ya ke seba pêvînayîşanê keye ameye dayene seba pêvînayîşê avûkatan asteng nîya û vat: "Muwekîlê ma yê ke cezaya dîsîplînî înan rê ameye dayene têna nêeşkenê keyeyanê xo bivînê, ceza vera pêvînayîşê avûkatan nîya."

	&nbsp;