ÎRA: Aşma teşrîna peyêne de 4 rojnamegerî ameyî tepiştiş 

2019-12-03 14:26:10


	 

	AMED - Înîsîyatîfê Rojnamegeranê Azadan derheqê binpaykerdişê heqanê merdimanê rojnamegerîye de raporê teşrîna peyêne eşkera kerd. Gore raporî 4 rognamegerî ameyi tepiştene, vera 5 rojnamegeran hêriş ame kerdene û 139 rojnamegerî hema zî tepişte yê.

	 

	Înîsîyatîfê Rojnamegeranê Azadan (OGÎ) derheqê binpaykerdişê heqanê merdimanê rojnamegerîye de raporê teşrîna peyêne eşkera kerd. Raporî de ame vatene ke bi hawayêkê nîzamî rojnamegeran ser o teda yena kerdene û ame vatene: "Asan nîyo ke merdim behsê azadîya çapemenîye biko.'' Înîsîyatîfî bale ante bombardûmankerdişê rojnameyê Ozgur Ulke ser ke 25 serrî verê cû qewimîya û no hêriş şermezar kerd. Beyanatî de ame vatene: "Rewşa ewroyêne de her çiqas rojnameyî nêrê bombardûmankerdene zî hêrişê vera nînan dewam kenê. Êyê ke hêrişê rojnamegeran kenê sey 25 serra verê cû nika zî ma înan rê vanê ke no adir do şima zî bivêşno."

	 

	Gore raporî mengêke de 12 rojnamegerî ameyî destbendkerdene, polîsan eşt keyeyanê 8 rojnamegeran ser, 4 rojnamegerî ameyî tepiştene, vera 5 rojnamegerî hêriş ame kerdene, derheqê rojnamegerêkî de tehqîqat ame kerdene, seba 2 rojnamegeran dewa ameye akerdene, 51 rojnamegerî ameyî hukmkerdene, seba 1 rojnamegeran ceza ameye dayene.139 rojnamegerî zî hema zî zindanan de tepişte yê.