30 serrî eynî karî kena: Heta hêzê mi qîm bikero ez o bixebitîyî 

2019-10-19 13:31:03


	 

	EDENE - Fatma Karataşa ke 30 serrî yo hacetê mutbexê yê ke darê sa, miro, şîmşîr ameyê viraştene, roşena dîyar kerde ke seba weşîye ganî koçike darîn bêro xebitnayene.

	 

	Fatma Karataş kuçeyê Înonu yê sûka merkezî yê Edenî de hacetê mutbexî yê darîn roşena dîyar kena ke 30 serrî yo nê karî kena û arde ziwan ke pêwa şert û mercê xebate û krîzê ekonomî ra mecburê bixebityê û va ganî her kes pereyê xo qezenc bikero.

	 

	Fatmaya ke serê siba saete 07.00 de kuçeyê Înonu cayê xo gêna, her şert û mercê hewayî de karê xo kena û 4 berardişî bi 10 TL roşena. Fatma wina vana: “Ganî berardişî biweşî bêrê xebitnayîş. Nê berardişî zêde zêde mutbexan yenê xebitnayîş. Ez karê xo ra zaf kêfweş a. Ez berardişê ke seba weşîye baş ê roşena. Ez serê linganê xo de vinderî û hewceyê kesî nîya."

	 

	'Her wext cinîyan ra pawenê'

	 

	Fatmaye da zanayîş ke mêrdeyê aye nêweşo û seba nê tena xebityena, kîra dana û 4 domananê xo ewnîyena. Fatmaye wina va: "Seba ke mêrdeyê mi nêweş o pêro bar serê milê min o. Ez mecbura bixebitîyî. Seba keyeyê xo. Ez zehmetîyan ancena la seba mi problem nîyo. Ma şinê keye zî kar bendeyê ma yo. Domanî şinê mektebe. Ma werd viraznenê. Rewşa cinîyan birastî zehmet o. Her çî ma cinîyan ra pawenê."