Xecîce 46 rojî yo cenazaya lajê xo mucahîtî geyrena  

2019-09-04 11:54:09


	 

	MÊRDÎN - Amed de 21ê Temmuze de eştibî serê keyeyî û eştişê polîsan ser o Mucahît Yilmazî cuya xo vindî kerd û bi gumanê ‘înfaz’ rojeve de ca girewt. Cenazeya Mucahîtî, 46 rojî yo ke ameya teşîskerdiş zî nêdanê keye. Dayîka aye XecîceYilmaze wina va: "No çîyêke ameyo kerdiş kam dîn û huquq de ca gêno?"

	 

	Qezaya Baglarî yê Amedî 21ê Temmuze de eştişê polîsan de Mucahît Yilmazî qate hîrêne yê awanîya de ame qetilkerdene û çapemenîya hetgir de zî sey ‘proses de ame kiştiş' ame ramojnayîş. Cenazeya Mucahîtî, pêwa ke ameyo teşîskerdiş 46 rojî yo hetê dozgerî ra bi sebebê cîya nîno dayîş. Goreyê îfadeyê şahid û daneyê keyeyê ke hedîse ameyo viraştene, persê ‘gelo Mucahît Yilmaz ame înfazkerdiş’ ard hişê merdiman.

	 

	'Çîyê ke kenê zulmî wetayîr çîyêk nîyo'

	 

	Xecîceye ard ziwan ke cenazeya lajê aye 46 rojî yo bi hawayêke bêhuquqî morg de yeno vindernayîş û wina va: "46 rojî yo cenazeya ma nêdanê ma. Çîyê ke kenê zulm o. Lajê mi keye de kiştî. Her ca de rêçê engiştanê ey estê. Seba ke hesabê înan nîno cenaze nêdanê. Ez çi vajî. Nimûneyê DNAyî girewtî. Ma teşîs kerd. La nêdanê ma. Ê zî zanê ke lajê ma yo. Ma her roje Mêrdînî ra şinê Amed. Vanê ‘ma do şima bigeyrê, netîceyê DNAyî nêvejîyayê.' Çimê ma tena telefonan de yo.”