Rewşa Avşîna qije giran bena: Nêeşkena werd biwera 

2019-08-09 13:35:41


	 

	MÊRDÎN - Domana şenik bi nameyê Avşîne ke verê 6 serrî û 7 mengî ceza maye aye rê ame birnayene, 9 mengî yo bi maya xo dir zindan de manena û welîdnayîş ra nêweşîya aye hemanjîom (tumorê damar) esto. Ame zanayene ke rewşa Avşîne ameya sewîyeyêka krîtîk.

	 

	Avşîne aye ke seba dermankerdene aye nîna kerdene, dermanê aye zî nînê girewtene, ame zanayîş ke birînê rîyê aye heta qirîke aye aver şîyê û Avşîne seba nê nêeşkena werd biwera.

	 

	Hulya Usanmaza ke qezaya Artuklu ya Mêrdîn de ciwîyena bi îdiya ‘endama rêxistinî ya’ ameye hukmkerdene û rastê 6 serrî û 7 mengî ceza ameye. Hulya serra vîyarte de menga Kanûne de ameye tepiştene û serekîya HDPyî ya Artuklu kerdene. Hulya maya 3 domanan a û aye eşrawitî zindanê Tîpê E ya Mêrdînî û mecbur mende kêna xo Avşîne zî bigîra verê xo. Avşîne welîdnayîş ra nêweşîya aye hemanjîom (tumorê damar) estbi. La seba ke baş nêameye dermankerdene, dermanê aye nêameyî dayene û nêweşîya aye aver şî û yeno vatene nika rewşa aye ameya sewîyeyêka krîtîk.

	 

	Hîrê mengî yê dermanê aye nînê dayene

	 

	Avşîne 9 mengî yo maya xo dir tepişnayeya. Ganî 3 mengî reyke seba dermankerdene bişîne Edene û bi dermanê Ewropayî ameyne dermankerdene. Pêwa derman ameyne dayene zî seba zindan roj nêvînayne û hewa nêgirewtêne, dermankerdene de averşîyayîşek nêame meydan. Ame zanayene hîrê mengî yo dermanan nêxebitnena. Nêweşxane bi sebebê ‘dermankerdene baş nîno kerdene' derman birna û birînê rîyê Avşîne heta fekê aye aver şîyo.

	 

	'Kêna mi êdî nêeşkena werd biwera'

	 

	Pîyê aye Mehmet Emîn Usanmazo ke vizîr şi pêvînayîş û dîyar kerd ke birînê fekê Avşîne heta qirikê aye aver şîyê û va: "Pêvînayîş de bêmabên berma. Fekê aye de birîn ameybî meydan. Her ke şono ê birînî zêde benî. Seba nê werd nêwena. Kêna mi kîlo daya. Wa êdî seba aye çîyêk bikerî. Doktor va çîyêk ma biker çin o. Ancax dermanê aye bêrê çîyêk bêro kerdene. Doktorê aye Edene zî va ganî her wext bêro kontrol û zindan de rehet nêbena. Hema ke rewşe aye zaf xirab nêbîya ganî çîyêke bêro kerdene."

	 

	Mehmet Emîne arde ziwan ke hedîse berdê meclîs û dima ra wezaretê dade derheqê rewşe de zindan zanayîş waşt. Mehmet Emînî va nika ê nika geyrenê la vanê ‘raporêke wina bi ma dir çin o, zanayîş çin o' û va heme muracatê ma bi avûkatan dir kerdê z bênetîce mendê.