Cinî serê erdê zebeşan de yê 

2019-07-02 09:50:40


	 

	Medîne Mamedoglu

	 

	MÊRDÎN - Mêrdîn de mengê hamnanî de dimayê niha û genim nika zî çapê berardişê sey zebeş û petêxan dest pêkerd. Cinî serê erdan de çap kenê û  nêzdîyê di mengî dima do zebeş bêrê komkerdene.

	 

	Herême de xeylê ca de zebeşê ke tewr zêde bi Amedî namdarê yenê ramitene. Çapê zebeşan Mêrdîn de destpê kerd. Zebeş seba varanê Nîsane erey ameyî ramitiş û nika çapê înan ameyo  destpêkerdiş û dimayê awdayîşê do aşma Êlule de bêrê komkerdene.

	 

	Cinîya bi nameyê Fatma Akaya ke bi serran o serê erdê zebeşan de xebityena, dîyar kerde ke emsar seba varanî erey ramitiş kerdê û wina va: "Bi cinîyan dir ma bi rojane çap kenê. Serrê vîyarte ma tewr zêde fêkiyê xo ramitine. La emsar çapê ma erey kewt. Seba varanî bi. Ma 20 cinî pîya xebityenê. Ma saete 5ine de wirzenê û 1 de qedênenê."

	 

	‘Di mengî dima do bêrê komkerdene’

	 

	Fatmaye da zanayîş ke zebeşê înan organîk ê û wina va: "Zebeş û petêxê ma organîk ê. Dimayê çapkerdene ma awe danê Di mengî dima zî ma kom bikerê. Her çiqas nameyê tîya nêvejîyo zî zebeşê tîya zaf zêde yê. Ma her serre nê karî kenê. Ma nîmeyê berardişê xo roşenê û nîme zî xo rê verdenê.

	 

	Keda cinîyan pîl a

	 

	Fatmaye arde ziwan ke 5 rojê bîn karê înan mendo û do çap biqedîyo û wina va: "Sey her karî no kar zî kewenê serê milê cinîyan. No çap nêbo berardişêke baş nêvejîyeno. Do heme xira bibo. Komkerdiş de zî cinî xebityenê. Keda cinîyan tîya zî zaf zêde ya."