Cinîyê Şengalijî: Bêvengî yena manaya hemkarî 

2019-06-21 15:18:35


	 

	Nesrin Hisen-Viyan Said

	 

	ŞENGAL - Şengalijan hêrişê dewleta Tirkî yê seba îşxalkerdişê Başûrê Kurdistanî şermezar kerd. Ciwanan vat, “Ma amade yê ke vera îşxalkarîye şer bikerê.”

	 

	Qezaya Sînûne ya Şengalî de seba şermezarkerdişê îşxalkarîya Tirkî û dewleta Tirkî reyde hamparîya hêzanê Kurdî, rayraşîyayîşêk ame viraştene. Rayraşîyayîş hetê Yewîya Ciwanan a Êzidîyan (YCÊ) û Têgêrayîşê Cinîyan ê Êzidîyan ra ame organîzkerdene.  Bi tewrbîyayîşê hemwelatijanê Şengalî rayraşîyayîş vernîya Meclîsê Şarî yê Sînûne de dest pêkerd û heta cadeyê Mîfrîqî yê dewa Kersê dewam kerd.

	 

	'Gerek her kes vera hêrişan vejîyê'

	 

	"Dewleta Tirkî ya îşxalkare dişmena şaran a û seba xeyalê Osmanîye newe ra cehd kena ke temamê erdê Rojakewtena Mîyanêne îşxal bikera. Dewleta Tirkî nika ra cehd kena Başûr û Iraqî îşxal bikera. Îşxalkarîye reyde şarê herême komkiştişî ra derbaz kena. Nimûneyê naye yo verê çiman zî Efrîn û Sûrîye yê. Dewleta Tirkî bi na îşxalkarîye her roje sînorê ke bi qanûnanê mîyanneteweyî ameyê bewlîkerdene îxlal kena. Dewleta Tirkî, hemkarîya PDK û keyeyê Barzanî reyde Başûrî îşxal kena. Nika dewleta Tirkî wareyê îstîxbaratî ra bigêrê heta eskerîye, ekonomî û perwerdeyî mudaxeleyê Başûrê Kurdistanî kena. Îşxalkarîye reste merheleya winayêne ke konsolos Tirkî Hakan Karaçay sey Serekê Herêma Kurdistanî têgêrayîş keno.

	 

	'Yê ke ewro bêvengê hemkarîya hêrişan kenê'

	 

	Xeylî qerargeh û qereqolê Tirkî bi hemkarîya Barzanijan mîyanê erdê Başûrê Kurdistanî de ameyî bicakerdene. Dewleta Tirkî bi teyareyanê şerî Başûr de komkiştiş kena û mal û baxanê hemwelatijan talan kena. Tewr peynî de ciwano Êzidî yo binameyê Emîn Salihî yo ke eşîra Sîmoqîya ra yo bi destê dewleta Tirkî ame qetilkerdene. Nika zî dewleta Tirkî bi hemkarîya Barzanijan hêrişê Herêmanê Pawitişî yê Medya û Xakurkê kena. Labelê her roje derbanê giranan gerîlayanê qehremanan ra wena. Ma sey Yewîya Ciwanan a Êzidîyan û Têgêrayîşê Cinîyan ê Êzidîyan xoverdayîşê gerîlayan ê Xakurkê silam kenê. Ma sey ciwananê Êzidîyan amade yê ke vera hêrişanê serê erdê şer."