HDP: Ma rayîro hîrêyin ê, stratejîya ma nêbedilyaye  

2019-06-21 14:54:08


	 

	ENQERE - Hemserekanê Pêroyî yê HDP’yî dimayê mesajê Rayberê PKKyî Abdullah Ocalanî eşkerayîyêk daye û vat: ‘’Vatişê Birêz Ocalanî û stratejîya HDP’yî sey yewbînan ê.’’

	 

	Hemserekê Pêroyî yê HDP’yî Pervîn Bûldane û Sezaî Temllîyî bi rayîrê avûkatanê xo eşkerayîyêka nuştekîye daye û nê pare kerdî.

	 

	Eşkerayîye HDPyî wina ya:

	 

	‘’HDP partîyêka sembolê sîyasetê demokratîkî û muzakereyanê demokratîkan a. Tesbîtê Birêz Ocalanî yê semedê HDP’yî yo ke wayîrê tewirê neweyî yê sîyasetê Tirkîya yo, zaf xorî yê û manayêka înan a tarîxkî esta. Vatişê Birêz Ocalanî û stratejîya HDP’yî sey yewbînan ê. Wa no nêro vîrakerdene ke  Birêz Ocalan mîmarê fîkrîyatê ronayîşê HDP’yî yo. Birêz Ocalano ke mûhatabanê tewr muhîman ê meseleya Kurdî ra yew o ganî ci rê raşt bêro nêzdîbîyayene.

	 

	Ajansê Îktîdarî AA bi nê tewirê xo reyna ehleqê çapemenîye binpay kerd û eşkera îxlalkerdişê huqûqî yê Îmrali ramojna. Serokkomar Erdogano ke  bi nayî waşt ke Birêz Ocalanî û partîya ma biverdo pîye ya, esasî de bêçareyîya xo ramote.

	 

	Birêz Ocalanî bi perspektîfanê xo eşkera vato ke ‘Rayîro hîrêyin’ şima yê. No rayîrê haştîye yo. HDP ça ra yeno wa bêro vera zilm, zordarîye û nêheqîye de yo. HDP semedê sîyasetê demokratîkî biisrar o. Coka eşkerayîya Birêz Ocalanî û sîyasetê HDP’î sey yewbînan ê. Ma mabênê her di blokanê tarîxkî de het nêbenê û bi qerardarîya semedê rayîrê hîrêyinî tê gêrenê. Stratejîya HDP’yî ya Stenbolî de çîyêk nêbedilyaye.’’