'Seba qertê nasnameyê demvîyarte, şew û roje yenê vindertiş' 

2019-06-20 14:25:41


	 

	MERSÎN - 205 hezar û 84 multecîyê Sûrîyeyijî Mersîn de cuyenê, seba ke bibê wayîrê nasnameyê demvîyarte şew û roje ezîyet ancenê û hîn multecî qasê di hewteyan rêze pawenê.

	 

	Her cayê dinya de merdimî seba şer, xela, sebebê sîyasî mecbur manenê koçê welatêke bîn bikerê. Bi mîlyonan multecî seba ke heyat de bimanê mecbur manenê koçê welatê bînan bikerê. La rewşa multecîyan dinya û Tirkîya de nêzelalîyê xo pawena. Serra 2001 ra heta nika 20ê Hezîrane Roja Multecîyê dinya yena vîrardiş. Goreyê cigêrayîşan pêro dinya de hûmara multecîyan 70 mîlyon a. Dinya de deqeyêke de 24 kes mecbur manenê keyeyê xo terk bikerê. Goreyê raporê ke Mudirê Pêroyî yê Îdareyê Koçberî amade kerdo zî hûmara multecîyanê ke Sûrîye ra remayî û ameyê Tirkîya 3 mîlyon û 567 hezar û 130 o. 

	Gorey nê raporî, hûmara 225 hezar û 557 heb merkezê starbîyayîşî, 3 mîlyon û 341 hezar û 573 zî bajarê Tirkîya de cuyenê. Bajarê ke tewr zêde multecîyê Sûriye ci de yê wina yê: Stenbol, Bursa, Îzmîr, Konya, Edene, Mersîn, Hatay, Dîlok, Kîlîs û Riha yê. Hûmara multecîyê ke Mersîn de cuyenê zî 205 hezar û 784 kes ê.

	 

	Şew û roje pawenê

	 

	Multecîyê ke Mersîn de cuyenê seba qertê nasnameyê demvîyarte bigîrê verê Awanîya Xizmetê Mudirê Îdareyê Koçberî yê Mersînî qezaya Akdenîzî ya û girêdayê Walitî ya bi şew û roje rêze de pawenê. No qert xeylê heqê multecîyan sey weşîye, perwerde, geyr û xebat zî dano û multecî seba ke nê qertî bigirê ezîyetêke pîl ancenê. Eynî wextî de zî rastê heqeretê xebatkaran yenê.