'Ma do vera fuhuş, asîmîlasyonî bi ruhê 68an têkoşîn bikerê' 

2019-06-19 15:36:47


	 

	Berîtan Canozer

	 

	AMED - Endama Meclîsa Ciwanan ê HDPyî Sevîm Akdag hemleyê ‘mebe tiryak, azad be’ vera fuhuş, tiryakî û asîmîlasyonî ameyo destpêkerdene şîrove kerde û va: "Sere de Kurdistan de pêro Tirkîya de ma do rayîr nêdê tiryakî, fuhuş û asîmîlasyon. Ma veng danê pêro ciwanan ke dorê nê hemlî de bibê yew û têkoşîn bikerê."

	 

	Meclîsê Ciwanan ê HDPyî vera polîtîkayê tiryakî, fuhuş û asîmîlasyonî hemleyê ‘mebe tiryak, azad be’ dayî destpêkerdene. Endama Meclîsê Ciwanan ê HDPyî Sevîm Akdage derheqê hemleyî de qisey kerde û va dewlete bi taybet mintiqa de polîtîkayêke taybet meşnena.

	 

	Sevîme da zanayîş ke dimayê kongreya ciwanan ê Amedî kerdê û dima ra herêman de qerarê meclîsbîyayîşî dayê û nê ser meclîs awan kerdê û va: "Vernê de herême, dima ra zî merkez û qezayê ma meclîs îlan kerdî. Her bajar ra bi tewrbîyayîşê 2-3 kesan rojê vîyarte de ma Enqere de meclîsê pêroyî îlan kerd. Ma meclîsêke ciwanan ê pêro mintiqa tewrbîyayîş û wayîrvatiş îlan kerd. Ma munaqeşe meşnayî. Ma problemê rêxistinbîyayîşê ciwanan û astengîyên vernî munaqeşe kerd. Ma polîtîkayê şer ê taybet munaqeşe kerd û teşhîr kerd.”

	 

	'Polîtîkayêke cinîyê ciwan rayîr ra vejenê yenê meşnayîş'

	 

	Sevîme da zanayîş ke vera vatişê zayendperest, îstîsmarê domanan û kiştişê cinîyan, bi rayberîya cinîyê ciwanan qerarê pîlkerdişê têkoşînê ameyo dayene û wina va: "Na babete de bê teredut do camêrdî bêrê teşhîrkerdene. Reyna Kurdistan û Tirkîya de qirkerdişê xoza yeno kerdene. Dewî yenê vengkerdiş û veşnayîş. Ma ciwanî vera nê têkoşînêke rêxistinkerde bimeşnê. Tena bi îzahatan ney, gerek têkoşînêke bi tesîr bibo. Reyna eynî wextî de cinîyan ser o polîtîkayê rayîr ra vetiş yenê meşnayîş."

	 

	Sevîme da zanayîş ke vera nê pêro polîtîkayan ciwan pawitişê cewherî yê komelî û pawitişê cewherî yê fîzîkî de bê û va: Ma do dewe bi dewe, tax bi taxe, kuçe bi kuçe, keye bi keye bigeyrê. Ma do êdî pozîsyonêke pasîf de nêbê. Ma do pozîsyonêke têkoşîn de bê. Tîryakî, fuhuş, asîmîlasyon û qirkerdişê xoza tena problemê hetê komelî nîyo. Problemê pêroyî yo."

	 

	'Ma do bi ruhê 68an têkoşîn girs bikerê'

	 

	Sevîme bale ante serê hemleyê ‘mebe tiryak, azad be’ û va na kampanya bi çar hemlayan yena kerdene û her ca de biresnê komelî û va: "Hemleyo yewin; çapkerdişê buroşurê ma amadekerdiş û vilakerdişê înan o. Ma do bi nê buroşuran bikewê her keye. Ma hedef kenê xo biresnê pêro dayîk, cinî, ciwan û domanan. Hemleyê diyîn zî panel, komel, konferans ê. Sewîyeya hîrên zî rayşîyayîşê girseyî yo. Sewîyeya çarin zî awankerdişê merkezê rehabîlîtasyonî yê. Ma do bi ruhê 68an têkoşîn bikerê. Ma do Kurdistan û Tirkîya de rayîr nêdê fuhuş, asîmîlasyon û tiryakî. Ez veng dana pêro ciwanan ke dorê hemleyî de bibê yew û têkoşîn bikerê."