'Ez do serê herra xo de bendeyê xelasîya domananê xo bî' 

2019-06-19 15:20:58


	 

	Ehlam Heci

	 

	ŞENGAL - Maya bi nameyê Koçer Hesin û kêna aye Evîne ke destê çeteyê DAÎŞî ameyî xelisnayîş, qalê hîkeyeya xo kerdî. Koçer û Evîna ke destê çeteyan ra ameyî xelisnayîş û vatî: "Ma zaf bêrîya herra xo ya pîroz kerdebî. Vera şîdetî ma do her wext xo ver bidê û herra xo bipawê."

	 

	Fermanê 3ê Tebaxa 2014an de DAÎŞî hêrişê Şengalî kerd û netîce de xeylê cinîyê Kurd ê Êzidî ameyî qetilkerdiş. Xeylê ci ameyî remnayîş. Maya bi nameyê Koçer Hesin û kêna aye Evîna 15 serrî zî hetê çeteyê DAÎŞî ra ameybî remnayîş. Bi xoverdayîşê Baxozî Koçer û Evîne ameyî xelisnayîş. Koçer û Evîne qalê hîkayeya xo ke destê DAÎŞî de bî û dima ra hetê QSDyî ra ameyî xelisnayîş, qalî kerdî.

	 

	'DAÎŞî mi 7 rey rot'

	 

	Evîne wina va: "DAÎŞî mi û keyeyê mi Şengal ra remna. Ma berd Til Efer û uca ra mi derbazê Sûrîye kerdî û ez uca de 5 serrî menda. DAÎŞî mi 7 rey rot. Seba ke mi sey înan nêkerdêne her wext dayne mêro û ganê mor kerdêne. Dima ra ma berdî Baxoz û nêzdîyê di mengî ma uca de mendî. Çîyêk çinbi ma biwerê. Ma vêşan mendêne. Şer giran bi. Dima ra ma derbazê Kampa Holî bî. Mi qetî bawer nêkerdêne ke ez destê DAÎŞî ra xelas bibî. Cilê sîya dayne ma ro. La mi qet çarşefa sîya r ahes nêkerd. Ez nika zaf kêfweşa ke ameya xelisnayîş."

	 

	'Ez do serê herra xo de bendeyê xelisnayîşê domananê xo bî'

	 

	Maya Evîne, Koçer Hesine zî wina va: "Şengal de DAÎŞî wexto ke ma tepiştî 2 lajê mi û 7 kênayê mi bî. Kênayêke mi ra girewtî. Di lajê mi zî xo dir berdî. Rewşa ma xirab bi. Ma berdî Til Efer û Mûsûl. Cinîyê emrê pîl kiştine. Dima ra ma berdî Reqa. Ma uca de 5 rojî zindan de mendî. Ma nêzdîyê 50 cinî û domanî bî. Wexto ke domanê mi, mi ra girewtî ez zaf xemgîn bîya. Hîn zî domanê mi destê çeteyan de estê. Ez spas kena ke YPG û YPJyî ma xelisna. Ez zaf kêfweşa ke kêna mi destê çeteyan ra amî xelisnayîş. Ez umîd kena ke domanê mi bêrê xelisnayîş. Ez do serê herra xo de bendeyê xelisnayîşê domananê xo bî."