'Ganî seba domanan polîtîkayê pawitişî bêrê awankerdiş' 

2019-06-19 15:06:34


	 

	
		AMED - Endama Komeleya Şîdetî vera Domanan Ebru Engîne dîyar kerde ke domanî rastê xeylê tewir şîdetî yenê û wina va: "Pêro komeleyê domanan û Torra Hemkarîya Seba Vernîgirewtişê Şîdetê Serê Domanan, ganî na babete de polîtîkayan awan bikerê. Reyna Meclîs ganî Komîsyonê Heqê Domanan bêro awankerdiş."
	
		 
	
		Tirkîya îmza eşta binê Pêameyîşê Heqê Domanan ê Dinya, labelê heqê domanan nîno pawitiş. Semedo ke nê maddeyî bi ca nînê şîdet, îstîsmar û karkerîya domanan zî her şono zêde beno. Goreyê raporî aşma Gulane, 14 domanî ameyê qetilkerdiş û 27 domanî zî rastê îstîsmarê zayendî ameyê. Endama Komeleya Şîdetî vera Domanan, Ebru Engîne da zanayîş ke mekanîzmayê derheqê pawitişê domanan de û rewşa zanayîşê heqê merdiman zî Tirkîya de qels o.
	
		 
	
		Seba vernîgirewtişê şîdetî xebat yenê meşnayîş
	
		 
	
		Ebruye derheqê xebatê komeleyî de zanayîş da û wina va: "Komele 2012an de amî awankerdiş. Ma vera vernîgirewtişê şîdetê serê domanan xebatan meşnenê. Na komele tewr zêde hetê averşîyayîşê polîtîkayan de xebatan meşnena. Ma senîn eşkenê şîdetê serê domanan tespît bikerê? Ma eşkenê senîn daneyan kom bikerê? Ma eşkenê senîn bikerê rapor? Ma nê ser munaqeşe kenê."
	
		 
	
		Ebruye arde ziwan ke xeylê tewir şîdet estê û da zanayîş ke domanî rastê her tewir şîdetî yenê. Cayê ke bê têduştî estbo, doman rastê şîdetî yenê. Bi taybet zî warê perwerde de vernîya waştişê domanan girewtiş zî şîdet o.
	
		 
	
		Ebruye tewr peyîn wina va: "Seba şîdet wirzo, ver acezakerdiş ganî nêzdîbîyayîşê ke vernîya şîdetî yeno girewtene esas bêro girewtiş û va: "Pêro komeleyê domanan û Torra Hemkarîya seba Vernîgirewtişê Şîdetî Serê Domanan, ganî na babete de polîtîka bêrê awankerdene. Reyna  Meclîs de ganî Komîsyonê Heqê Domanan bêrê awankerdiş."