Cinîyê Mexmûrî reaksîyon vera hêrişê Başûrê Kurdistanî dayî 

2019-06-12 15:05:33


	 

	MEXMÛR - Cinîyê Mexmûrî reaksîyon vera hêrişê dewleta tirkan ê serê Başûrî Kurdistanî dayî û vatî: "Ma hêrişê serê herra xo qebul nêkenê. Se beno wa bibo, ganî şarê Kurd bibo yew û vera nê hêrişan vinderê."

	 

	Dewleta tirkan 27ê Gulane ra heta nika hêrişê Xakurkî ya Herêma Bradostî yê girêdayê Başûrê Kurdistanî kena. Derheqê babete de cinîyê Mexmûrî dîyar kerdî ke ê do het apeynî vera hêrişan vinderê û wina vatî: "Ma nê hêrişan lanet kenê. Ma sey şarê Kurd qetî vera hêrişan sere nêtewênenê û ma do xoverdayîşê xo dewam bikerê." 

	 

	'Ganî tu kes hetkarîya dişminê şarê Kurdî nêkero'

	 

	Maya bi nameyê Emîne Sihate nêrazîbîyayîşê xo vera hêrişan arde ziwan û va: "Dewleta tirkan bi tank û topê xo hêrişê Xakurke kena. Çi karê înan serê herra Başurê Kurdistanî de esta. Hêrişê dewijan kena, mîyanê baxçeyê înan de dewijan bombarduman kena û qetil kena. Ganî pêro dinya vera nê hêrişan de vindera. Ganî destpêk de rayedarê Başûrê Kurdistanî vera nê vinderê. Pêro koyanê ma bombardûman kenê û adir erzenê ci. No cayêk dinya de zî nîno qebulkerdene. Ganî tu kes hetkarê dişminê şarê Kurdî nêkero."

	 

	 'Her merdimêke lazim o heqê xo û herra xo bipawo'

	 

	Maya bi nameyê Fadile Yilmaze wina va: "Dewleta tirkan bizano kurdêke ça de yo uca bombardûman kena. Bi 25 serrî yo ma vera zulmî ameyî koçberkerdiş. Her ca de dişminîyê şarê Kurdî yeno kerdene. Labelê vera dişminî şarê Kurd nêbeno yew. No zî kêmîyêke pîl o. Çi karê dewleta tirkan serê herra Başûr de esto? Iraq û rayedarê Başûrê Kurdistanî vera nê reaksîyon nêmojnenê ra. Hêrişê sivîlan kenê û înan qetil kenê. Ganî ma vera nê bêveng nêmanê. Her merdimêke lazim o heqê xo û herra xo bipawo. PKK vera zulm û nêheqî rawişto, ver aîşxalkerdişî rawişt o. Senîn PKK pêro kurdan wayîr vejîyeno, vengdayîşê ma seba hukmatê Başûr zî o yo ke pêro kurdan rê wayîr vejîyo."