Ocaxê kirecî bêfîltre, jehr vila keno: Ma hewayêke pak wazenê 

2019-06-10 13:10:20


	 

	MÊRDÎN - Ocaxê kirêcî yê hetê Nuhoglu Kîreç A.Ş ke mabêne Mêrdîn-Qoserî de xebityenê, zirarêke pîl dano şar û ganeyan. Ocaxê ke bêfîltre yeno xebitnayîş, tesîrêke pîl serê domanan û welatîyan keno. Cinîyan dîyar kerdî ke êdî wa çareserîyêke bêro vînayene û hewayêke pak wazenê.

	 

	 

	Ocaxê kirêcî yê hetê Nuhoglu Kîreç A.Ş yê 7 kîlometre Mêrdînî dûrî yo û serê rayîrê Qoserî yo, 6 serre yeno xebitnayene û xoza û weşîya şarî tehdîd keno. Koyê ke xebat yeno kerdene, pêro ameyo parçekerdene û rayîrê şono Qoserî zî bi rîsk o, hem kar û hem zî wesayîtê derbaz benê, binê xetereyî de yê. Ocaxê ke nîno zanayene çend serrî îhaleyê ci esto, xêrcê xoza zirarêke pîl dano welatîyê taxa Îstasyonî.

	 

	'Ma pêro jehrî benê' 

	 

	Sînem Tekîna 3 serrî na taxe de cuyena wina va: "Ma pêro dûman ra jehr benê. Ma nêeşkenê vejîyê serê banî, yan zî balkone. Ma wazenê çareyêke bêro vînayene. Ma rayşîyayîş û çalakî kerdî. La kesî çîyêk nêva. Cayêke pak keyeyê ma de nêmaneno. Ma nê fabrîqa ra razî nîyê."

	 

	'Bi serran o jehr ancenê'

	 

	Sîneme dewam de da zanayîş ke ocax zirar dano pêro ganeyan û wina va: "Domanê ma pêro bi nêweşîya astimî konê. Nêeşkenê vejîyê teber û kay bikerê. Ma cilê xo şonê û fînenê ra dima ra pêro benê sîya. Ma şî Walîtî la serdayîş veng vejîya. Zirarêke pîl dano ma û xoza. Ganî çareserîyêke bêro vînayene."

	 

	'Domanê ma bi astim konê'

	 

	Halîse Keklîkçî zî ard ziwan ke ocax zirarêke pîl dano ganeyan û herêm. Nêweşîyê astim, bronşînt û xeylê nêweşî zêde bîyê. Halîseye ard ziwan ke ganî çareserîyêke bêro vînayene û va dûman ra nêeşkenê serê ban de û balkonan de binişnê ro.

	 

	Halîseye wina qedêna: "Ocax 8 serrî yo herêm de faaliyet de yo. Bi vatiş ma aciz bî. Ne serrêke ne di serrî. Şandînan merdim vano qey vewre varena. Bi 3 serrî yo zêde bîyo. Merdimî şan de yewbînan nêvînenê. Ma hewayêke pak wazenê. Cu tîya nêmenda."

	 

	Cinîya bi nameyê Adule Aburşu zî va: "Heywanê ma jehrî benê û mirenê. Semedê tozê ocaxe mirenê. La ma xapênenê û vanê ma se kerdo. Ma pêro kixunê. Ma êdî nêzanê se bikerê. Ma nêwazenê keyeyê xo verdê. Yan wa fîltre viraznê yan zî wa tîya ra şorê. Êdî bes o.”