Welatîyê ke do roşan pêşwazî bikerê: Ma nêeşkenê sifreyêke bi zerre xo ronê 

2019-06-02 11:19:53


	 

	AMED - Bi krîzê ekonomî dir heme çî bîyo vay. Roşanê Remezanî rê tena çend roj mend. Welatî û esnaf semedê vayîye gerekerdox ê, hemwelatî nêeşkenê dayîş û girewtiş bikerê û esnaf zî nêeşkenê çîyêk biroşê. Welatîyan dîyar kerd ke emsar nêeşkenê sifreyêke bi zerre xo rafînê.

	 

	Roşanê Remezanî rê çend roj mend. Welatî semedê amadekarî kewtî mîyanê tevger. Esnaf û welatîyan dîyar kerdî ke bi rojan o, ê nêeşkenê pîzey xo mird bikerê. Bi ameyîşê aşma Remezanî dir zî tewr zêde krîzo bîyaye xo ramojna. Welatî nêeşkenê sifreyê xo binexşînê û şekiran bigîrê. Esnafan zî xemê xo ardî ziwan û vatî ke semedo ke mecbur ê do fek esnafî ra vera bidê.

	 

	'Krîzî da roşanî ro zî'

	 

	Xebatkara rotişî a ke nêwaşt nameyê xo bido, dîyar kerde emsar goreyê serê verênan vayîya şekiran sera 20 zêde bîyê û wina va: "Ne ê kesê ke roşenê û ne zî ê kesê ke gênê rewşa ra razî nîyê. Welatî nêeşkenê bigîrê û ma zî nêeşkenê erjan bidê."

	 

	'Ma nêeşkenê sifreyêke bi zerre xo ronê' 

	 

	Cinîya bi nameyê Perîhan Karabuluta ke amadekarîya roşanî kena wina qalî kerde: "Vayîya şîrînayî û şekiran zaf zêde bîyê. La mecburê ke bigîrê. Ma emsar nêeşkenê sifreyêke bi zerre xo ronê semedo ke pêro çî zaf bîyê vay. Hîn çî estê ke ma do teserûf înan ra bikerê. Edî goşt seba ma luks o."

	 

	'Şekirî zaf vayê'

	 

	Şukruye Esene zî arde ziwan ke aye şekirê roşanî nêgirewtê û qiseykerdişê xo wina derg kerde: "Sey her çî şekir zî zaf vay bîyê. Krîzê ekonomî da roşan ro zî."

	 

	'Mi çîyêk nêgirewt'

	 

	Cinîya bi nameyê Şahsenem Gezena ke sey cinîyanê bînan derheqê vayî de acisîyê xo arde ziwan û wina va: "Mi qet çîyêk nêgirewt. La eke ez bigîrî zî mecbûrî çîyê ke lazim ê ez do bigîrî. Heme çî vayo, êdî şekirê roşanî zî luks bîyê ma rê."

	 

	'Şekiran temaşe kena'

	 

	Muxlise Sayitoglu zî arde ziwan ke kuçeyê veng veng rayîra şinê û wina va: "Wexto ke ma kuçeyan de geyrenê, tena temaşeyê şekiran kenê. Semedo ke bêpereyo ma nêeşkenê lazimîyê xo yê roşanî bi ca bîyarê. Bi krîzê ekonomî dir bêkarî zî zêde bi. Ma do heta key wina bicuyê nêzana."