Organîzasyonê Efû ra hemverê îşkenceyê Xelfetî de kampanya 

2019-05-25 15:19:13


	 

	MERKEZÊ XEBERAN - Organîzasyonê Efû yê Mîyanneteweyî seba kesanê ke Xelfetî de ameybî destbendkerdene û înan rê îşkence amebi kerdene kampanya daye destpêkerdene. Metnê kampanya de ame vatene ke seba kesanê ke îşkence dîyo “Rayîrê destekê tibî yê xoserî bêro akerdene.”

	 

	Şûbeyê Tirkîya yê Organîzasyonê Efû yê Mîyanneteweyî derheqê kesanê ke Mehlaya Dêrto (Dergîlî) ya qezaya Xelfetî ya Riha de ameybî destbendkerdene û înan rê îşkence amebi kerdene de kampanyayêka îmzayan a bi “Kodê Çalakîye ya Lezgîne” daye destpêkerdene.

	 

	Tehdîdê îşkenceyî dewam keno

	 

	Organîzasyonê Efû derheqê babete de nê vatî: “Dest de îdîayê rastî estê ke kesê ke ameyê destbendkerdene înan rê îşkence ameyo kerdene û rastê muameleyê xirabî ameyê. Bi tarîxê 24ê Gulane 3ê înan domanî pêro pîya 22 kesî serbest ameyê veradayene. Labelê 25 kesî hewna zî Şûbeyê Mudurîya Terorî yê Riha de binê nezaretî de yê, înan ser o tehdîdê îşkenceyî û muameleyê xirabî esto. Hetêna ra ê kesê ke hewna binê çiman de yê ganî înan rê tavilî rayîr bêro akerdene ke biresê destekê tibî yê xoserî.”

	 

	Metnê kampanya de ame vatene: “Îşkence yan zî tewirê bînan ê muamaleyê xirabî yê ke teberê anorê merdimîye de yê hem huqûqê mîyanneteweyîyî de hem zî huqûqê zereyî yê Tirkîya de bêîstîsna ameyê qedexekerdene.” 

	 

	Lînkê kampanyaya Organîzasyonê Efû wina yo:

	 

	https://acileylem.org.tr/eylem/onlarca-kisi-goezaltinda-iskence-tehdidi-altinda.