Maya hepsîyan: Çîyêk bi domananê ma bibo do kam hesab bido 

2019-05-23 14:31:13


	 

	Berîtan Canozer

	 

	AMED - Maya çalakwana grevê vêşanîye Leyla Uyanik, Şehrîban Uyanike va, do seba domananê xo têkoşîn bikerê û dewlete seba çareserî game nêerzena, eke çîyêk bi domananê ma înan bibo do hesab bidê.

	 

	Çalakîya grevê vêşanîye ya hemsereka Kongeraya Komelê Demokratîk (KCD) û parlamentera Partiya Demoratîke ya Şaran (HDP) ya Colemêrgî Leyla Guvene ke bi amancê wedartişê tecrîdê serê Rayberê PKKyî Abdullah Ocalanî da destpêkerdiş, roja 197ine de dewam kena. 1ê adare ra zî pêro zindanan de 7 hezarî ra zêde hepsî çalakîya xo dewam kenê. 30 hepsî kewtî rojeyê mergî.

	 

	Yew hepsîyan ra zî Leyla Uyanik a û 1ê adare de zindanê Sîncanî ya Cinîyan de grevê vêşanîye da. Maya aye Şehrîban Uyanike da zanayîş ke rewşa hepsîyan krîtîk a û wina va: "Hewteyê vîyarte de pêvînayîşê akerde bi, la domanê mi nêverdayî ez şîrî. Seba ke ez do nêbaş bibî, nêverdayî. Kêna mi ya qij şî pêvînayîş. Problemê înan yê weşîye estbî la moralê înan baş bîyo, Do, vîtamînê B1 û şimitişê bi şekir nêdanê hepsîyan. Heta nika cilşitişê hepsîyan bi la ê zî girewtê. Hewl danê ke bi înan game bidê eştiş. Gardiyanê camêrdî saete ra 3 rey kewenê odayan û goşdarî kenê. Pêwa îqazkerdişê hepsîyan gardiyanê camêrd wina kenê. Radyoyê înan zî ame girewtiş. Rojname nêdanê înan. Heme heqê înan ameyo xespkerdiş."

	 

	Şehrîbane arde ziwan ke domanê înan fek xoverdayîş ra vera nêdanê û her ca de xoverdayîşê mayan esto û wina va: "Dewlete seba çareserî game nêerzena. Eke çîyêk bi domanê ma bibo, do hesab bidê. Eke çapemenîya hetgir rewşa hepsîyan bidîne do çalakî hende derg nêbîne. Ma do heta peynî verê domananê xo de bê. Rayîrê înan rayîrê heqîqetî yo. Waştişê înan waştişê ma yo. Ganî veng bidê vengê domananê ma."