2011 de vera tecrîdî bedenê xo da vera adir, ewro zî 108 rojî yo grev de yo 

2019-05-22 14:57:46


	 

	Berîtan Canozer

	 

	AMED - Mayê ke parka Koşuyolu înan rê ame qedexekerdiş, pêwa heme astengîyan seba ke domanê înan bicuyê xo ver danê. Xizal Yildirime dîyar kerde ke domanê înan xo ver bidê ê do zî xo ver danê û va lajê aye Mehmet Yildirim 108 rojî yo grevê vêşanîye de yo û her serre 2011an de zî zindanê Tîpê D yê Amedî vera tecrîdî bedenê xo dayo verê adir, 8 serran de 4 rey kewt grevê vêşanîye.

	 

	Çalakîya grevê vêşanîye û rojeyê mergî dewam kenê û endîşeyê keyeyan zî zêde benê. Mayê ke nêwazenê domanê înan bimirê,  21 roje dorê Parka Koşuyolu çalakî kenê. Mayê ke wazenê vengê xo bidê eşnawitiş, pêwa heme polîtîkayê pelçiqnayîşî her roj saete 12.00an de yenê têhet. 

	 

	17 serrî de 16 serrî ceza

	 

	Xizale da zanayîş ke lajê aye Mehmet 2009an ameyo tepiştiş û 16 serra ceza ci rê ameya birnayîş û 2011an de zindanê Tîpê D yê Amedî vera tecrîdî bedenê xo da vera adir û wina va: "Dimayê nê hedîse surgunê zindanê Tîpê T yê Bafrayî kerdî. Lajê mi hema uca de yo. 8 serran de 4 rey kewt grev. Lajê mi 17 serrî de, bi qasê emrê ceza ci rê birnay. Domanê Kurd emrê qij de xoverdayîş musenê. Bi serran o xêrcê qirkerdiş û surgunan çîyêk nêame cuyayîş. Dewlete da piro, şarê Kurd xo ver da. Her wext wina bi. Ciwanê Kurd bi ganê xo, xo ver danê. Seba çi? Seba ke Abdullah Ocalan yeno tecrîdkerdiş. Çira no zulm. Wa no tecrîd bêro wedartiş. Lajê mi 17 serrî bi 16 serrî ceza ci rê birnay. Tu delîl çinbi dosya ey de. Kurdistan de bi hezaran mayî û domanî çimê înan rayîr de yo. Bendeyê pêvînayîş ê. Sucê domananê ma çin o. Domanê ma seba ziwan û tarîxê xo têkoşîn dayî û nika zî bi bedenê xo têkoşîn kenê. Heta domanê ma têkoşîn bikerê ma do zî bikerê. Ma do qetî peyser game nêerzê."