Maya hepsî: Lajê mi nê rayîrî weçîna, ez bi ey serberz a 

2019-05-22 14:10:35


	 

	Rengîn Azîzoglu

	 

	AMED - Maya hepsî bi nameyê Zahîr Barano 1ê Adare de zindanê Panosî de grevê vêşanîye de yo, dîyar kerde ke aye bi lajê xo serberz a û wina va: "Lajê mi nê rayîr tercîh kerdo. Amancê mi o yo ke ez do têkoşîn bikerî. Ma keyeyê xo nê, herra xo fikrîyenê. Ma bi lajê xo serberz ê. Ma do wayîrê waştiş û çalakîya ey vejîyê."

	 

	Çalakîya grevê vêşanîye ya hemsereka KCDyî û parlamentera HDPyî ya Colemêrgî Leyla Guvene ke bi amancê wedartişê tecrîdê serê rayberê PKKyî Abdullah Ocalan da destpêkerdiş, roja 196 de dewam kena. 1ê Adare de zî pêro zindanan 7 hezarî zêde hepsî çalakîya xo dewam kenê. 30 hepsî zî kewtî rojeyê mergî.

	 

	Zahîr Barano zî 8 serrî hepsîyo û 1ê Adare de grevê vêşanîye de yo. Zahîr wexto ke newe ame tepiştiş 4 serran Amedî tepişnaye mend û dima ra surgunê Rîze û uca ra zî surgunê Panosî ame kerdiş.

	 

	'Ma zaf waştişê lajê xo yê'

	 

	Maya ey Şukran Barane dîyar kerde ke 4 serrî tahliyeya lajê ey rê mend û bêîmkanê ekonomî nêeşkenê şorê pêvînayîş û wina va: "Lajê mi va ez kewta grev. Vernê de nêva. Dima ra mi fam kerd û ey zî va. Va ‘heta tecrîd dewam bikero do xoverdayîşê ma zî dewam bikero'. Ma zî pey waştişê lajê xo yê. Tedayê serê ma înan berd nê çalakî ser. Ma çîyêk ra nêtersenê. Hepsî pêro domanê min ê. Pêro ganê min ê. Heta tecrîd nêro wedartiş ne ma, ne zî ey azad nêbenê. Coka ma vera îradeyê înan rêzdar ê”

	 

	'Amancê mi no yo ez têkoşîn kena'

	 

	Şukrane da zanayîş ke lajê aye emro qij de beşdarê çalakî û rayşîyayîşan bîne û wina va: "Kes nêşîne zî o şîne. Her wext mîyanê xebatan de bi. Wayîrê wicdan bi. Vera nêheqî bêveng nêmendêne. Nika zaf kîlo dayo. Rewşa înan baş nîyo. Ez qehrêna. Ma nêwazenê domanê ma bimrê. Ez veng dana wezaretê dade bikerê, ganî waştişê înan bêro waştiş. Domanê ma vera tedayan xo ver danê. Wa cenazeyê înan nêrê."