Çalakwana grevê vêşanîye de ya: Ma bi umîd ê û ma do serkewte bê 

2019-05-19 13:13:39


	 

	Berîtan Canozer

	 

	AMED - Gullî Daşçiya ke 1ê Adare de grevê vêşanîye de ya, ame dîyarkerdiş ke gonî vêrêjena û dej ancena. Gullî pêvînayîşê telefonî de keyeyê xo rê wina va: "Ma bi umîd ê, ez bawer kena ke ma do serkewte bibê. Vêşanîye ma nêkişeno, esas de wexto ke wayîrê çalakîya ma nêvejîyê ma do bimirê."

	 

	Çalakîya grevê vêşanîya hemsereka KCDyî û parlamentera HDPyî ya Colemêrgî Leyla Guvene ke bi amancê wedartişê tecrîdê serê Rayberê PKKyî Abdullah Ocalan da destpêkerdiş, dewam keno. Zindanê cîya de zî 7 hezarî ra tewr zêde hepsî grev de yê. Gullî Daşçi ya 2 serrî ya zindanê Tîpê E yê Mêrdînî de ya, bi eynî waştişan 1ê Adare ra grevê vêşanîye de ya.

	 

	'Ma merdişêke bi rumet tercîh kenê'

	 

	Ame diyarkerdiş ke Gullî 5 roj verê gonî virata, meşnayîş de zehmetîyan ancena û dejê bedenê aye zêde bîyo. Gullî ya ke tansîyonê aye zaf kewena, keyeyê aye da zanayîş ke vera roşnî zî xesas bîya. Gullî ke rojê vîyarte de bi telefon keyeyê xo dir pêvînayîş kerda û dîyar kerda ke ê bi moral ê û bi umîd ê. Gullî veng da şarî û da zanayîş ke bêvengîye do merd bîyara. 

	 

	Mesajê Gulliye winayo:

	 

	“Ma xeylê rey va, tecrîd sucê merdimayî yo. Ma her wext vanê. Ganî tecrîd bêro wedartiş, pêvînayîş bêrê kerdiş. Vernîya aştî û demokrasî yê Tirkîya bi no hewa eşkeno bêro akerdene. Sîyaset xitimîya yo. Ma çalakgerê grevê vêşanîye fek têkoşîn ra vera nêdê. Ma do xoverdayîş dewam bikerê. Ma problemê weşîye cuyenê la vera ke cuyake bêrumet bicuyê, ma merdişêke bi rumet tercih kenê. Ma bi moral ê, bi coş ê. Bi hevî yê. Ma do serkewte bê. Grevê vêşanîye merg nîyo, esas de eke şima wayîrê çalakîya ma nêvejîyê ma do bimirê. Seba nê ganî şarê ma wayîrê xoverdayîşê ma vejîyo û xoverdayişê ma girs bikerê. Dayikan tena meverdê.  Ma xoverdayîşê her kesî silam kenê."