‘Çimê ci tarî benî û nêeşkeno payan ser de vindero’ 

2019-05-18 17:22:18


	 

	MÊRDÎN - Dayîka hepsîyo bi nameyê Îbrahîm Kayayo ke 154 rojî yo Zîndanê Kandira de grevê vêşanîye de yo, Sultan Kayaye dîyar kerde ke wexto ke lajê xo dîya ci nêşinasnaya û bedecê ci de cayê sîya estbî. Kayaye va: “Çimê ci tarî benî û nêeşkeno payan ser de vindero.”

	 

	Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 192. de dewam kena. Badê Guvene xoverdayîş 16ê Kanûne de zindananê Tirkîye û Kurdistanî de dest pêkerd û 1ê Adare de zî vilayê pêroyê zindanan bî.

	 

	Bi hezar hepsîyî nika grevê vêşanîye de yî û xoverdayîşê zîndanan roja 154. de dewam kena. 15 hepsîyê grevê vêşanîye de bî, 30ê Nîsane de çalakîya xo derbazê merheleyêka newe kerdî û rojeyê mergî dayî dest pêkerdene. Dima ra zî 10ê Gulane de grûba diyîn ke a zî 15 hepsîyan ra pê yena semedê şikitişê tecrîdê serê Rayberê PKKyî Abdullah Ocalanî dest bi rojeyê mergî kerde. Nê hepsîyan ra yew zî hepsîyo bi nameyê Îbrahîm Kayayo ke 154 rojî yo Zîndanê Kandira de grevê vêşanîye de yo. Dayîka Îbrahîmî, Sultan Kayaye dîyar kerde ke wexto ke lajê xo dîya ci nêşinasnaya û bedecê ci de cayê sîya estbî.

	 

	'No wijdanêke senîn o edaletêke senîn o'

	 

	Goreyo ke keyeyê Îbrahîmî da zanayene Îbrahîm 20 kîlo dayo û bedenê ci de cayê sîya virazîyayî. Sultan Kaya va: “Gurçikê Îbrahîmî îfla kerdo. Çimê ci tarî benî û nêeşkeno payan ser de vindero. Pêvînayîş de wexto ke mi lajê xo dî, mi ci nêşinasnaya. Ge-ge tansîyonê ci vejîyeno û şekirê ci zêde beno. Lajê mi pêvînayîş de ma nêvînayêne û nêeşkayêne payan ser de bimano. Rewşa heme hepsîyan seyyewbînan bîye. Rewşa weşîya înan baş nêbî, la moralê înan baş bî. Pêroyê dayîkan piştî danî domananê xo.”