Bêrîvan Bitmena 134 rojî yo grevê vêşanîye de ya: Ma do ser bikewî 

2019-05-18 15:37:30


	 

	ÊLIH- Bêrîvan Bitmene 134 rojî yo ke Zîndanê Bunyanî de grevê vêşanîye de ya. Keyeyê Bêrîvan Bitmene bi rayîrê telefonî kênaya xo reyde pêvînayîş pê ard û Berîvane telefon de wina vata: “Heqê xo helal bikerêne. Do serewedarnayîşê ma bi serkewtişî tacedar bibo.” 

	 

	Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 192. de dewam kena. 16ê Kanûne de zindananê Tirkîya û herêmî de grevê vêşanîye dest pêkerdî û 1ê Adare de zî vilayê pêroyê zindanan bîye. Grevê vêşanîye yê bi hezaran hexwsîyan zî roja 154. de dewam kena. 

	 

	30ê Nîsane de 15 hepsîyê PKK û PAJKî grevê vêşanîye açarnayî rojeyê mergî û dima ra 15 hepsîyê bînî zî semedê şikitişê tecrîdê serê Rayberê PKKyî Abdullah Ocalanî 10ê Gulane de dest bi rojeyê mergî kerdî. Bi no hawa grevê vêşanîye derbazê merheleyêka newe bî. Keyeyê hepsîyan bi nameyê Bêrîvan Bitmena ke Zîndanê Bunyanî yê Qeyserî de 134 rojî yo grevê vêşanîye de ya bi rayîrê telefonî kênaya xo reyde pêvînayîş pê ard. Keyeyê Berîvan Bitmene dîyar kerde ke rewşa weşîya kênaya aye xirab a.

	 

	Nêeşkena rayîr şêra û qisey bikera

	 

	Keyeyê Berivane dîyar kerd ke kênaya înan hetê qiseykerdişî de zehmetîyan ancena û goşê aye zî giran bîyî. Keyeyê Berîvane qala pêvînayîşo ke telefon de kênaya xo reyde kerdî, kerd û va: “Berîvan nêşkena rayîr şêra. Wexto ke ma gêrena vana ‘heqê xo helal bikerêne.’ Rewşa weşîya aye baş nîya, labelê moralê aye zaf baş o. Berîvane dîyar kerde ke heta tecrîd nêwedarîyo do fek çalakîya xo ra vera nêda. 5 aşman cezaya pêvînayîşî dayî Berîvane. Ma tersenî ke sewbîna reyêk kênaya xo nêvînî.” 

	 

	Parlamentera Êlihî Ayşe Acar Başarane zî hesabê xo yê Twitterî ser de derheqê rewşa Bêrîvane de parekerdişêk kerde û va: “Bêrîvane şew nêeşkena rakewa. Qirika xo ra çîyêko qehweyî erzena teber. Nêeşkena rayîr şêra. Pêvînayîşê avûkatan de bi kursîya tekelin vejîyena. Sewbîna sîneyê aye ser de kîtleyêk virazîyaya.”