Xoverdayoxa grevê vêşanîye Zelal Fîdan: Çalakîya ma veng nîya, şima zî bawer bikerê 

2019-05-17 14:50:23


	 

	Rengîn Azîzoglu

	 

	AMED - Zelal Fîdana ke zindanê Tîpê D yê Amedî de 1ê Adare ra grevê vêşanîye de ya. Maya aye Urmiye Fîdane da zanayîş ke bi wedartişê tecrîdî do aştî bêro û wina va: "Domanê ma vatî: "Çalakîya ma veng nîya, şima zî bawer bikerê'. Bawerîya ma bi domananê ma temam a."

	 

	Çalakîya grevê vêşanîye ya hemsereka KCD û parlamentera HDPyî ya Colemêrgî Leyla Guvene bi amancê wedartişê tecrîdê serê Rayberê PKKyî Abdullah Ocalanî, da destpêkerdene bi beşdarbîyayîşê 7 hezar hepsîyan dewam kena. 30ê Nîsane de 15 kesê ke kewtî rojeyê mergî roja 18in de çalakîya xo dewam kenê. 10ê gulane de zî komêke bîn dest bi rojeyê mergî kerd.

	 

	Zelal Fîdane ya 1994an de ameya dinya zindanê Tîpê D yê Amedî de 1ê Adare ra grevê xo dewam kena. Wendekara unîversîteya Dîcle beşa hiqûqî ya û Zelale bi sebebê beşdarê çalakî bîya derheqê aye de dewa amî akerdene û 7 serrî ceza aye rê ame birnayene. Zelale 2 serrî yo hepsî ya û roja 78in çalakîya vêşanîye de ya.

	 

	'Her kesî dir  eleqedar bî' 

	 

	Urmîye Fîdane da zanayîş ke Zelale kesêke fedekar bîya û Mugla de Beşê PDR wenda û teda û faşîzmê uca qebul nêerda û reyna kewta îmtihan Fakulteya Huqûqî qezenc kerda. Urmîyeye wina va: "Qij bî waştêne huquq biwano. Vatêne ez do bikewî dewaya Qirkerdişê Ermenîyan. Ruhê merdiman de bibo xora esto. Hîsgêr bî. Embazanê xo ra hes kerdêne. Nika grevê vêşanî de ya."

	 

	'Waştişê domananê ma waştişêke heqdar o'

	 

	Urmîye da zanayîş ke Zelale 1ê adare de kewta grev û wina va: "Telefon de pîyê xo ra va 'seba ke tecrîd bêrowedartene kewta grev.' Pîyê aye ame keye û mi ra vat. A şewe meymanê ma bî. Ma zaf werd amadekerdib. Çîyêk qirke ma ra derbaz nêbi. Ez piştdayîş dana çalakîya kêna xo. Waştişê domananê ma waştişêke heqdar o. Tecrîd serê her kesî de yeno kerdene. Bi wedartişê tecrîdî do her kes rehet bikero. Do aştîye bêra. Nê têkoşîn de bi hezaran ciwanan cuya xo vindîkerd."

	 

	Urmîye arde ziwan ke ê her hewte şinê pêvînayîş û wina va: "Ma keye de aye fikrîyenê, la ma şinê pêvînayîş ê moral danê ma. Zaf kîlo daya. Merdim xemgîn beno. Vêşanî zehmet a. Evîn Kaya rewşa aye qet baş nîya. Bi tena sereyê xo nêeşkena bimeşo. Rewşa înan baş nîya, l apêwa nê bi moral ê."

	 

	Urmîye tewr peyîn qiseykerdişê xo de da zanayîş ke bawerîya înan bi domananê înan tam a, la teber ra ewnîyenê bêvengî ra tersenê û wina va: "Kes nêvano hende kes vêşan o, ma çîyêk bikerê.' Têkoşîn ten aserê milê dayîkan de mendo. Înan rê zulm kenê. Nê dayîkî nê kerdişan heq nêkenê. Domanê ma seba ke no zulm bêro wedartene têkoşîn kenê. Ganî dewlete bivîno û game bierzo."