Bakirkoy de dayîkî reyna ameyî astengkerdene 

2019-05-13 15:19:24


	 

	STENBOL - Merdimê hepsîyan ke vera tecrîdkerdişê Rayberê PKKyî Abdullah Ocalanî grevê vêşanîye de yê, waşt ke ver bi vernîya Zîndanê Bakirkoyî rayra şorê, labelê polîsan rayraşîyayîş asteng kerd.

	 

	Keyeyê girewteyan seba ke paştdayîş bidê domananê xo û bale biancê çalakîya înan a vera tecrîdî ser, çalakîya xo ya nobete dewam kenê. Keyeyî her roje hetê polîsan ra yenê astengkerdene, labelê keyeyî bi qerardarîye çalakîya xo rê dewam kenê. Reyna keyeyê hepsîyan waştî ke şêrî verê Zîndanê Padaye yê Cinîyan yê Bakirkoyî. Serê nameyê Konfederasyonê Sendîkaya Kedkaranê Rayapêroyî (KESK) yê Şûbeyê Stenbolî Ayfer Koçake zî seba piştîdayîşê keyeyan ewca de bîye. Keyeyê hepsîyan kişta rayîrê E-5 de arê bîyî û ewja ra waştî ke bi rayîrşîyayîşî şêrî verê Zîndanê Cinîyan yê Bakirkoyî.

	 

	'Ma seba domananê xo tîyayê'

	 

	Dayîkan polîsan dir pêvînayîşêke kilm kerdî û vatî tena seba xoverdayîşê domananê xo rê bibê veng tîya de yê û yew merdime hepsî va ke: "Ma seba polîsan, eskeran, seba aştîye, demokrasî, seba komelî tîya de yê. Wexto ke leşker mirenê ma zî kewenê ver."

	 

	Polîsan vera nê waştişê dayîkan ser o vatî ke, qerarê qeymaqamî esto qetî destûrê çalakîye çin o. Bi nêdestûrdayîşê polîsan ser o keyeyî cayê çalakîye ra vejîyayî.