Jîyana Aya ke grevê vêşanî de ya bîye 35 kîlo 

2019-05-13 14:32:36


	 

	MÊRDÎN - Jiyan Aya vera tecrîdi 1ê Adare de grevê vêşanîye de ya û prosesê grevî de kewte 35 kîloyan, rewşa aye baş nîya. Dayîka aye Ayhan Aye wina va: "Aye dir nêweşîya helinayîşê esteyan esta. 3 aşmî cezaya neqlgirewtene dayê. Ma zanayîş aye ra nêgînê. Bi avûkatan dir nêeşkena pêvînayîş bikero. Ganî ma nê domanê ke seba cuyêka weş mucadele kenê, bidê cuyayîş."

	 

	Çalakîyê grevê vêşanîye bi amancê wedartişê tecrîdê serê Rayberê PKKyî Abdullah Ocalanî zindanan de ame destpêkerdene dewam kenê. 30ê Nîsane de 15 hepsî dest bi rojeyê mergî kerdî û 10 Gulane de zî 15 hepsîyê bîn beşdarê rojeyê mergî bî.

	 

	Rewşa hepsîyê ke grev de her ke şino xirab bena. Merdimê hepsîyan zî veng dayî ke veng bidê vengê hepsîyan û waştişê înan bêrê ca.

	 

	'Jiyane dir helinayîşê esteyan esto'

	 

	Jîyan Aya 22 serrî pêrodayîşê Nisêbînê Mêrdînî mabêne serrê 2015-2016an de amî tepiştiş û 1ê Adare ra grevê vêşanîye de ya. Jiyane roja 19ê çalakîya aye de bi 3 embazê aye dir zindanê Tîpê L yê Panosî de surgunê zindanê Tîpê T yê Qeyserî kerdî.

	 

	Jiyane 45 kîlo bî, bi grev dir kewte 35 kîloyî. Dayîka aye Ayhan Aye wina va: "Qedexeyê Nisêbînî de amî tepiştiş. Serrêke zindanê Mîdyatî de mende. Dima ra surgunê Panosî amî kerdene. 3 serrî yo tepişnayeya. Çend aşmî verê surgunê Qeyserî amî kerdene. Kewta 35 kîloyan. Helnayîşê esteyan aye dir estê. Rewşa Jîyane qet baş nîya. Ganî tecrîd bêro wedartene. Ganî nê tedayî peynî bibê."

	 

	Ayhane da zanayîş ke qiseykerdişê peynî kênaya aye dir, vengê kêna aye baş nêbîyo û dimayê aye cezaya neqlkerdene 3 aşman ameya birnayene. Ayhane veng da pêro kes seba domanê ke cuyêka baş mucadele kenê, bidê cuyayîş.