'Gelo do key Roja Dayîkan bi dayîkê Kurdan bidê ciwîyayene' 

2019-05-10 14:12:06


	 

	AMED - Yew dayîkê ke bê domananê xo kewena Roja Dayîkan, Gulîstan Guvena, Gulîstane dîyar kerde ke di domanê aye 1ê Adare ra zindan de grev de yê û wina va: "Gelo key Roja Dayîkan bi ma dayîkê Kurdan bidê ciwîyayîş! Sey serrê veênan ma nika zî verê xoverdayîşê domananê xo nê."

	 

	Dayîkê Kurd sey her serre emsar zî Roja Dayîkan bi xemgînî la bi têkoşînêke pîl pêşwazî kenê. Xeylê dayîkê ke domanê xo vindî kerdê, na roje yan serê goristanan de yan zî zindanan de derbaz kenê. Dayîk emsar zî seba domananê xo yê grev de yê kuçeyan de xo ver danê.

	 

	Yew nê dayîkê ke bi serran o hesretê domananê xo cuyena, Gulîstan Guvena. Gulîstane dewa Reşikî ya Farqînê Amedî de yena dinya û hema 5 serrî bena dayîka xo vindîkena, 2 serrî ra dima pîyê xo vindî kena. 13 serrî de yena zewicnayîş. 12 domanê aye estê û cuya aye bi feqîrî, çinbîyayîş û têkoşîn derbaz beno. Serra 1999an de dimayê ke Rayberê PKKyî Abdullah Ocalan teslîmê Tirkîya ame kerdene, Gulîstane yena Amed û beşdarê grevê vêşanîye bena. Grev de yena tepiştiş û dimayê 15 rojî tepiştişî yena tewqîfkerdiş. Gulîstane pêwa emrê xo yê nika zî mucadeleyê xo dana. Di domanê Gulîstane zî seba wedartişê tecrîdî nika zindan de 1ê Adare ra grev de yê.

	 

	Emrê aye bii mucadele derbaz bîyo

	 

	Gulîstane dîyar kerde ke serra 1999an de dimayê ke eşnawito Abdullah Ocalanî ardê Tirkîya yena Amed û wina va: "Seba azadîya ey mi zî bi embazanê xo dir têkoşîn da. Ez kewta grevê vêşanîye. Wexto ke ma grev de bî ma 15 rojî tepişnaye mendî. Dima ra ma tewqîf kerdî. Senîn nika domanê ma kewtî grev, ma zî o wext kewtî grev. Mi zindan de zaf îşkence vîna. Dimayê ke zindan ra vejîyaya ma şîya Enqere. domanê mi qij bî. Mi înan verda û ez şîya Enqere. Uca de ma derb kerdî."

	 

	2 domanê mi zindan de yê

	 

	Gulîstane da zanayîş ke pêwa heme zulm û dejê dewlete ê poşman nîyê û wina va: "Ma mucadeleyê azadîya xo bi her tewir meşna. Ma tu çîyêkema poşman bê, ma nêkerd. Nika ez pîr bîya. Ez reyke bîn bîrê dinya ez do tewr zêde têkoşîn bikerê. Wexto ke cesaret bibo, ganî merdim pey cesaret şêro. Ez xêrê îradeyê xo ameya nê emrî. Nika kênayêke û lajêke mi zindan de yê. Her serre eştêne serrê keyeyê mi de. Berê mi şiknayne. Verê sîlehî dayene ma. Ma tehdîd kerdêne."

	 

	Îşkenceyê 44 saet rayîrî

	 

	Gulîstane va lajê aye Metîn (48) û kêna aye Sudan (44) nika zindan de yê û wina va: "Sudane wexto ke domane bî sey adir bî. Seba Sudane 12 serrî ceza amî birnayene. Seba ke Kurd bî, îdarekara HDPyî bî amî tepiştiş. Nika 4 serrî cezaya aye menda. Xeylê îşkence dî. Zindanê Elezîzî ra surgunê Alanyayî amî kerdene. 44 saetan de berdî Alanya. Îşkence û heqaret aye rê kerdî. Dimayê ke şî, seba ke grevê vêşanîye de bî, aye 15 rojan kerdî hucre. Metîn zî 1992an de ame tepiştiş, cezaya muebetî ci rê amî birnayene. Beşdarê PKKyî bibi. Zindanê Amedî de mendêne. Dima ra surgunê Amasya, Sîncan kerdî. Nika zî Karabuk de yo. 3 serrî mendo serbest bêro veradayîş. 95an de zindanê Amed de kewt grev. Nika zî grev de yo. 1ê Adare ra domanê mi kewtî grev. Zulm înan rê kenê, îşkence bi înan kenê. Heqeratan kenê. Ez bi zerrî û gan piştdayîş dana domananê xo."

	 

	Gulîstane tewr peyîn qiseykerdişê xo de bale ante serê Roja Dayîkan û hîsê xo wina qalî kerde: "Ma seba domananê xo aştî û azadîye wazenê. Dayîkê Kurdan key roja dayîkan cuyayê ke do nika bicuyê. Ma do a roje seba domananê xo yan serê goristanan de bê, yan zî verê zindanan de bê. Ma heta peynî pey waştişê heqdar ê domananê xo nê."