
'Cehenem bi ma danê cuyayîş'  

2019-05-09 13:52:18


	&nbsp;

	Dîlan Babat

	&nbsp;

	ENQERE - Roja dayîkan nêzdî bena û dayîkê hepsîyê grevê vêşanî de yê verê zindanan ra nêvisênê û wina vanê: "Xelata tewr pîl seba ma wedartişê tecrîdî yo. Peynîameyîşê grevê vêşanîye yo. Yê ke vanê 'cenet binê linganê dayîkan de yo' cehenem bi ma danê cuyayîş."

	&nbsp;

	Verê Roja Dayîkan ê roja yewşeme bêro pîrozkerdene, dayîkê Kurdan reyna seba domananê xo verê zindanan de yê. Grêvê vêşanîye seba wedartişê tecrîdî ameyî destpêkerdiş dewam kenê û dayîkê hepsîyan zî verê zindanan de vera hêrişan xo ver danê.

	&nbsp;

	'Ma roja dayîkan pîroz nêkenê'

	&nbsp;

	Dayîka hepsîya bi nameyê Suheyla Taşa ke zindanê Sîncanî 26ê Kanûne de grevê vêşanî de ya, Nezahat Taşe dîyar kerde ke emsar do Roja Dayîkan xemgîn derbaz bikero û wina va: "Kêna mi bi di serrî yo zindan de ya û roja Dayîkan de kîşte min de nîya. 7 hezar domanê ma grev de yê. Ma wazenê Roja Dayîkan pîroz bikerê. Domanê ma roj bi roje helênê. Wexto ke zerrîya ma hende bi dej bo, bêguman Roja Dayîkan zî seba ma bê mana ya. Ewro pêro dayîk verê zindanan de seba domananê xo têkoşîn kenê."

	&nbsp;

	'Xelata tewr pîl wedartişê tecrîdî yo'

	&nbsp;

	Nezahate da zanayîş ke serra vîyarte Roja Dayîkan kêna xo vînaya û wina va: "Ma zindan de bî, qet nêbo saxlem bî. Nika ganê aye êdî êdî helêno. Weşîya înan xira bena. Suheyla çiqas bihuyo zî zerrîya mi seba înan bermena. Verê çimanê ma de helênê. Dewlete hema game nêeşta. Ganî game bêro eştene. Xelata tewr pîl seba ma a ya ke grev peynî bibê. 12ê Gulane de çîyo ke rîyê ma dano huyayîş, peynîbîyayîşê grevî yo."

	&nbsp;

	'Domanê ma mirenê, wa kes ma ra bêvengî nêpawo'

	&nbsp;

	Dayîka Aştîye Munîbe Koça ke birayê aye 1ê Adare de grev de yo wina va: "Zindanî seba şarê Kurdî ameyê awankerdiş. Serrê 80an ra dima rojêke veng nêmendê. Pîyê mi kewt, birayê mi kewt, nika zî birayê mi qij kewt grev. No welatî de erjê dayîkan çin o. Domanê ma mirenê û coka wa kes ma ra bêvengî nêpawo."

	&nbsp;

	'Cehenem bi ma danê cuyayîş'

	&nbsp;

	Munîbeye dewam de arde ziwan ke bi serran o keyeyê xo de roşan û roja Dayîkan pîroz nêkerda û wina va: "Domanê ma her roje mirenê. Ma her wext şinê zindanan. Coka manaya Roja Dayîkan nêmanena. Ma wazenê domananê xo ko bikerê. Serekomar vano 'cenet binê linganê dayîkan de yo'. La ma cenet ney ma cehenem cuyenê. Ma îşkenceyê ke dayîkan rê yeno kerdene vînenê. Madem dewlete erje dana dayîkan, ganî wa game bierzo. Ganî pêro kes destek bidê dayîkan."

	&nbsp;