Dayîkê hepsîyan: Dewlete dayîkan ra tersena 

2019-05-08 15:02:28


	 

	ÎZMÎR - Dayîkê hepsîyê ke grevê vêşanîye de yê veng dayî serekomar û dîyar kerdî ke merdişê zindanan ra o berpirsîyar o û vatî; no tecrîd seba çi yo gelo? Berpirsîyarê heme çî ti yê.

	 

	Dimayê 8 serran dima 2ê Gulane roja paşeme de Rayberê PKKyî Abdullah Ocalanî dir pêvînayîşêke kerdî. Muhtewayê pêvînayîşê saetêke û mesajê Abdullah Ocalan rojêke verê raya pêroyî dir ame parekerdene û her kesî verê xo da tepişnayeyê ke grevê vêşanî de yê. Dimayê saetan r adima hepsîyan îzahat dayî û vatî pêvînayîş pozîtîf o la no nîno manaya wedartişê tecrîdî û va heta waştişê înan nêrê qebulkerdiş do çalakî dewam bikero.

	 

	Dayîkê ke domanê înan grev de yê veng dayî Tayîp Erdogan û vatî: "Wa ne dayîkê Tirk, ne zî dayîkê Kurd nêbermê. Êdî bes o, wa tecrîd bêro wedartene."

	 

	'Çira no tecrîd'

	 

	Dayîka hepsîyê bi nameyê Ozkan Yaşaro ke Zindanê Tîpê T yê Hûmara 3ine ê Şakranî de 1ê Adare de hepsîyo, Xezal Yaşare va lajê aye bêhuqûq yeno tepiştiş û wina va: "Domanê ey nêmirenê. Domanê dayîkê Kurdan mirenê. Gerîla û leşker mirenê. Kezeba ey nêveşana. Madem ti serekkomar ê, wa pîlî ê to bo. Madem ti durust ê gelo no tecrîd çira esto? Çend kes zindan de merdî. Sebebê hemine ti yê. To no qirkerdiş kerd. Eke to qedexe nêkerdêne, hende kes nêşîne ver bi mergî."

	 

	'Çira dayîk yenê astengkerdene'

	 

	Xezale da zanayîş ke lajê aye 14 serrî yo zindan de yo û va: "Lajê mi şima rê leşkerî kerd. Madem Kurdî xirab ê, çira şima rê leşkerî kerd? Ez do sey dayîkêke senîn keyeyê xo de roşî? Rayîr nêdanê dayîkan. Çira? Ez 71 serrî ya. Ez doman nîya. Ez veng dana heme pawitoxê heqê merdiman, çapemenîya dina kena; wa wayîrê ma vejîyê. Domanê ma ameyê ver bi mergî. Ma fek têkoşîn ra vera nêdanê. Psîkolojîya m axira bî. Sucê nê ciwanan çi yo? Ma Wezaretê Dade, sazgehê heqê merdiman ê Ewropa ra ma bi gazinc ê."

	 

	'Dewlete dayîkan ra tersena'

	 

	Dayîka Firat Yagmekano ke Zindanê Hûmara F-2 ê Kiriklarî de maneno, Sultan Yagmekane zî da zanayîş ke ciwanî roj bi roje nêzdîyê mergî benê û wina va: "Xeylê hepsî rewşa înan baş nîya. Hêrişê dayîkan kenê. Ancax ma domananê xo xelas bikerê. Ma nêtersenê. wa kes zî ma ra nêterso."

	 

	Cinîya Abdulbahrî Yildirimî zî Zindanê Hûmara T-2 ê Şakranî de maneno û 26 serrî yo zindan de yo, Hanim Yildirime zî arde ziwan ke yewin waştişê hepsîyan wedartişê tecrîdê serê Abdullah Ocalanî yo û veng da ganî her kes wayîrê hepsîyan vejîyo.

	 

	Dayîka Abdulvahap û Şîar Aydemîro Zindanê Tîpê T yê Odemîşê Îzmîrî 1ê Adare ra grev de yê, Yildiz Aydemîre tena seba domananê xo ney, seba pêro hepsîyan vengdayîşê hîsgêrî kerde û wina qedêna: "Ganî ma destûr nêdê merdişan. Rewşa hepsîyan zaf xirab a. Tena seba domananê xo ney seba pêro xoverdayoxan edalet wazena."