Merdima hepsî: Ma şerm kenê keye de werd amade bikerê 

2019-05-06 13:56:41


	 

	Gulîstan Azak

	 

	AMED - Sezen Kayihan Dere dîyar kerde ke rewşa birayê aye Şafî Kayihan û embazê ey zindanê Panosî 1ê Adare de grev de yê xirab a û veng da hukmatî ganî waştişê meşrû û huqûqî yê çalakgeran ganî bêrê qebulkerdene.

	 

	Çalakîya grevê vêşanîye ya hemsereka Kongereya Komaleyê Demokratîk (KCD) û parlamentera Partîya Demokratîk ya Şaran (HDP) ya Colemêrgî Leyla Guvene ke bi amancê tecrîdê serê Rayberê PKKyî Abdullah Ocalanî bêro wedartiş da destpêkerdiş  1ê Adare de pêro zindanan rê vila bî. 7 hezarî r atewr zêde hepsî çalakîye dewam kenê û înan ra yew zî Şafî Kayihano 30 serre ke 10 serrî yo tepişnayeyo û nika zindanê Panosê Agirî de yo. Şafî 1ê Adare ra yo grevê bêdem û bêagerayîşî de yo.

	 

	Sezen Kayihan Dere arde ziwan ke birayê aye hetê derûdorî ra zaf yeno heskerdene û va pêvînayîşê aşma Nîsane de vînayê ke rewşa hepsîyan zaf xirab a.

	 

	'Her ke wext derbaz beno endîşeyê ma zêde benê'

	 

	Sezene arde ziwan ke her hewte bi bendemayîşêke pîl bendeyê telefonî yê û wina va: "Wexto ke cigêrayîş erey keweno, ma zaf benê bi endîşe. Roja sêşemeyê vîyarte de ma bendeyê telefonê ey bî. Her wext saetê serê sibayî de geyrayne la nêgeyra. Ma zaf tersayî. Ma geyrayî zindan. La ma xo nêresna zindan. Endîşeyê ma zêde bî. Ez Walî geyraya, o zî meşgul bi. Ma bi saetan zindan geyrayî. Tewr peyîn ma xo resna. Vatî telefon bi problem ê. Endîşeyê ma roj bi roje zêde benê."

	 

	'Bêvengî ma keno endîşe'

	 

	Sezene dewam de wina va: "Şafî pêvînayîş de ma teselî keno. La seba prosesî ma nêrehetê. Belê pew dewa xo heqdar ê. Ma zî vera îradêyê înan rêzdar ê. Yê ke ma keweno endîşeyan bêvengîya vera îradeyî yo. Şafî verê zî xeylê rey kewt grevê vêşanîye. La no grev yê bînan ra cîya yo. Ma aşma Sibate de şî pêvînayîşê ey.Her pêvînayîşê akerde de hepsîyan werdê îkramî ardêne. La na rey çinbi. Ti hepsîyêke nêardbi. Ma pers kerd, Şafî va hîn embazî kewtê grev, coka çîyêk nêardê. Seba dayîka ma xemgîn nêbo, ma nêpersa ke o zî kewto grev. La mi fam kerd ke o zî kewto grev. Hewteyo bîn ma geyrayî va o zî kewto grev. Ma vera qerarê rêzdar ê. Ma verê ey de yê."

	 

	'Tay empatî' 

	 

	Sezene da zanayîş ke wexto ke ê werd amade kenê xo ra şerm kenê û va hema ke zêde vindîbîyaye çin ê ganî waştişê înan bi ca bîyarê û wina va: "Ma nêeşkenê keyeyê xo de çîyêk viraznê. Gerek merdimî hîn empatî bikerê. Yê ke nêvînayîşê xoverdayîşî de israr kenê ma înan fam nêkenê. Ma keyeyê hepsî nêwazenê êdî kes bimro. Ganî waştişê hepsîyan bi ca bîyarê. Ma wayîrê heqê cu vejîyê. Ma bibê vengê înan."