'Polîtîkayê şaş cinî herre ra visneno' 

2019-05-04 09:47:33


	 

	Hamdiye Çîftçî

	 

	WAN - Muhendîsa Zîraatî Fatma Guvene, da zanîş ke seba polîtîkayê şaş yê ramitişî têkiliyê cinîyan herre ra visyayê, bi îthalatî dir zî krîzê ekonomî vejîyayo meydan û wina va: "Vayîye mazotî vay bi, piştdayîşêke seba citkaran nêameyo dayene, vayîye toxim û zibil vayo, hetê toxim de ma girêdayê teberî mendê. Nê faktoran tesîrêke negatîf serê ramitişî kerd."

	 

	Tirkîya ke welatêke ramitişî yo, nika kartol û pîyanz zî tede her tewir sebze û xidayêke îthal kena. Cinîyê ke destpêkê merdimayî de têkilîyê înan bi herre dir girêdaye yê, her warê ramitişî aver berdî la nika seba polîtîkayê şaş mecbur mendê herre ra bivisyê. Muhendîsa Zîraatî Fatma Guvene arde ziwan ke ramitiş êdî seba cinîyan barêke giran yeno vînayene.

	 

	Fatmaye da zanayîş ke cinîyan verê xo dayê wareyê cîya yê û wina va: "Kasiyerî kenê, sekreterî kenê. Êdî karê wina cinîyan rê ergonomîk yenê. Cinî fek ramitiş ra vera danê şinê karê bînan kenê. Komeleyê cinîyan, meclîsê cinîyan û bi ameyîşê têhetbîyayîş reyna eşkenê têkilîyê cinî bi herre dir bidê xurtkerdiş."

	 

	‘Kesê ke unîversîte qedênayê zî ramitiş de xebityenê'

	 

	Fatmaye da zanayîş ke cinîyê ke unîversîte qedênayî zî serê erdan de xebityenê û wina va: "Cinîyê ke wendê û tayîn nêbîyê zî warê ramitişî de xebityenê. Xora sey karkerê mewsîmî xebityenê. Cinîyê ke baxçeyê xo de serê erdê xo de xebityenê estê."

	 

	‘Hûmara domanê karkeran zêde bena’

	 

	Fatmaye wina va: "Herêmê ma de hîn qezayan de sera estê. Erdîş, Westan û Qelqelî de zî ramitiş yeno kerdene. Ê cayan de şarî rê sebze roşenê. Hûmara domanê ê cayan de xebityenê zaf zêde yê. Domanê 6 serreyî şinê serê erdan de xebityenê estê."

	 

	‘Komeleyê ke bi ramitişî dir eleqedar bibê krîz ra tesîr nêbenê’

	 

	Fatmaye dewam de da zanayîş welatê ke bi ramitişî dir eleqedar bibê, berardişê xo bi xo bikerê, krîz ra zêde bi tesîr nêbenê û wina va: "Sebebê ke bi hewayêke negatîf tesîr ro ramitişî kenê estê. Vayîye mazotî, seba citkaran nêdayîşê piştdayîşî yo. Vayîye toxim û zibil zêde ya. Seba ke pereyê citkar çin o, nêeşkeno karkeran zî bigîro. Seba ke berardiş wextê xo de nîno komkerdiş, rijêno. Ma toximê xo bêkalîte vînenê û teber ra anê. Toximê ke teber ra yenê zî zaf vayê. Nimûne Colemêrg û Mukus de toximê herêmî çin o. Eynî wextî de mewsîm zî tesîr keno. Pesdewarî û ramitiş zî eşkenê aver berê. Herêma ma seba pesdewarî baş a. Ganî merdim aver bero."