Cinîyê Qamişloyijî: Ma do vera îqtîdaran her wext têkoşîn bikerê 

2019-05-03 13:54:23


	 

	Şêrîn Zêrevan

	 

	QAMIŞLO - Cinîyê Qamişloyijî derheqê ronayîşê dêsê ke dewleta Tirkan Efrîn de dayê ro, reaksîyonê xo ramojna û va: "Efrîn Efrînijan o û do ê înan bimano."

	 

	Dimayê ke dewleta Tirkan û komê girêdayê aye hêrişê Efrînî kerdî dima, şarê Efrînî Şehba de bi ca bî. Nika zî dewleta Tirkan sînor mabêne Efrîn û Şehbayî de awan kena ke Efrînî herra Sûrîye ra parçe bikera. Derheqê babete de cinîyê Qamişloyijî reaksîyonê xo ramojnayî û ronayîşê sînor bi şîdet şermezar kerdî.

	 

	'Ma do seba herra xo her wext têkoşîn bikerê'

	 

	Emîna Mihemede bale ante serê kerdişê dewleta Tirkan serê şarê Efrînî û wina va: "Ma sey şarê kurd bi yew vengî her roje bi çalakîyan nê kerdişê dewleta Tirkan şermezar bikerê, îşxalkerdişê înan do vindî bikero. Ma qetî qebul nêkenê ke cinîyê Efrînijî dûrê herre xo bimanê. Ma do her çî bikerê heta cinîyê Efrînî ageyrê ser herra xo. Ma do seba herra xo her wext têkoşîn bikerê."

	 

	'Ganî ma bi têkoşînê xo serkewtiş mende bikerê'

	 

	Emînaye ronayîşê dêsê dewleta Tirkan ê Efrînî şermezar kerde û va: "Ma parçekerdiş qebûl nêkenê. Efrîn ê şarê Efrînî yo. Êdî bes o, bêvengîya dewletê mîyannetewî rê, bes o têmîyanbîyayîşî rê. Wa her kes verê sazgehê heqê merdiman bi erjê xo wirzo. Ganî ma bi têkoşînê xo serkewtişê mende bikerê."

	 

	'Ma sey cinî amade yê ke xoverdayîşê xo heta peynî dewam bikerê'

	 

	Kamila Ehmede zî wina va: "Verê çimê dinya de pêro Efrîn ame îşxalkerdiş. Heme dewlete zî xo bêveng kerdî û kerdişê dewleta Tirkan serê şarî de dewam keno. Ma sey cinî amade yê ke xoverdayîşê xo heta peynî dewam bikerê, heta Efrîn xilas bibo. Sînor nêeşkenê şarê Efrînî herra Efrînî ra bivisnê. Ma do her wext vera îqtîdar têkoşîn bikerê."