'Ma kîşte hepsîyan de yê, ma do bêveng nêmanê' 

2019-04-28 13:06:01


	 

	WAN - Lokman Aslano ke zindanê Tîpê T yê Xerpêtî de grev de yo, keyeyê xo ra wina vato: "Ma do çalakîya xo dewam bikerê, yewin wezîfeyê şima o yo ke teber de vengê ma bidê eşnawitiş." Keyeyê ey zî da zanayîş ke ê rewşa weşîye hepsîyan ra bi endîşe yê, kîşte hepsîyan de yê û va do bêveng nêmanê.

	 

	Çalakîya grevê vêşanîye ya hemsereka KCD û parlamentera HDPyî ya Colemêrgî Leyla Guvene ke bi amancê tecrîdê serê Rayberê PKKyî Abdullah Ocalanî bêro wedartene dest pêkerd, roja 172in de dewam kena. 1ê Adare ra dima hûmara hepsîyê ke kewtê grev resayî 7 hezar. Yew ê hepsîyan ra zî Lokman Aslan o zindanê Tîpê T yê Xerpêtî yê 1ê Adare de kewto grev. Keyeyê Lokmanî derheqê rewşa ey de zanayîş da û veng dayî raya pêroyî û hukmatî.

	 

	'Vengê ma bidê eşnawitiş'

	 

	Dayîka Lokman, Hizar Aslane arde ziwan ke Lokman 21 serrî yo zindan de yo û wina va: "Ma bi çinbîyayîşê ey musayî la ma nêeşkenê dejê ey biancê. Qet nêbo ma zanayne zindan de cuyeno. La seba nê grevan ma bi endîşeyîn ê. Zindanê Tîpê L yê Panos ê Agiriyî surgunê zindanê Tîpê T yê Xerpêtî bi. 1ê Adare ra grev de yo. Rewşa ey qet baş nîyo. Ma nêeşkenê şêrê pêvînayîşan. Ma bi telefon qisey kenê. La qiseykerdişê ci qet çîyêk nêameyne famkerdiş. Asayeyne ke rewşa ey baş nêbê. Lajê mi 'Peynî merg bibo zî ma do têkoşîn bikerê. Wezîfeyê şima zî o yo ke şima vengê ma bidê eşnawitiş."

	 

	'Ez her siba bi ters aya bena'

	 

	Hizare arde ziwan ke her siba bi ters aya bena û wina va: “Ez tersena ke çîyêk bi lajê mi bibo. Ne şanê ma ne rojê ma mend o. Ma bi rehetî çîyêk nêwenê. Ganî bi lezgînî game bêro eştene."

	 

	Waya Lokman, Kubra Aslane zî arde ziwan ke selahîyetdarî bêvengî de yê û wina va: "Welat vera heme çalakîyan astengî esto. Yê ke qisey kenê yenê bêvengkerdiş. Ma heta peynî pey hepsîyan ê xo yê. Ma bêveng nêmanê û vengê xo bidê eşnawitiş."