Rojeva bazaran zam a: Ma nêeşkenê bigîrê, çîyo ke bêro vatene çin o 

2019-04-24 14:16:13


	 

	Gulîstan Azak

	 

	AMED - Dimayê weçînayîşan zam her ware de ame kerdene tesîr bazaran ser zî kerd. Şarê ke vejîyayî bazar dîyar kerdî ke sebebê krîzî hukmat nêbo kam o û vatî ê nêeşkenê çîyêke bigîrê.

	 

	Dimayê weçînayîşê 31ê Adare ra dima zam ameyî û vayîye motorînî dimayê weçînayîşî di rey zêde bi. Heto bîn ra bazaran de zî krîz tesîr kerd û şar vayîye çîyan ra acis bîyo.

	 

	Cinîya bi nameyê Aysel Yalape va vayîye bazarî tesîrêke pîl serê înan de kerdo û seba zamî kes nêeşkeno çîyêk bigîro û wina va: "Bazaran de dayîş û girewtiş êdî bîyo luks. Coka bazarî veng mendê. Merdimî ewnîyenê tezgehan ra û derbaz benê. Esnafî zî nêeşkenê çîyêk roşê."

	 

	'Nê welatî de tu erja ma çin a'

	 

	Cinîyêke bîn ke nêwaşte nameyê xo bido seba persê 'şima çira nêeşkenê bigîrê?' wina va: "Nê persî mi ra ney, ê serê ma rê bikerê. Ma hîrê aşman ra reyke meaşê teqawitbîyayîşî gênê, vanê qey qîm keno. No welatî de erja merdimayî çin a."

	 

	Kamîle Hayirtaşe zî wina va: "Krîzê ekonomî Amed de zaf bi tesîr o. Selahîyetdarê dewlete vera ke danê yewbînan ro, wa bêrê biewnê şarî ra. Ez memûrê teqawîtkerdî ya. Ez 60 serrî Enqere de ciwîya ya. Demêk verê ez ameya tîya. Ez seba şarê Amedî zaf xemgîn bena. Bajarêke zaf vayo. Çi sucê nê şarî esto."

	 

	Nurcan Sezere zî reaksîyon ramojna zamê ke her roj yenê kerdene û va berpirsîyarê nê krîzî hukmat o  û va terorê bazarî ganî peynî bibo.

	 

	Reyhan Kavute zî arde ziwan ke seba problemê debare acis bîyê û va her çî vayo, nêeşkenê bigîrî û va sewbînî vatiş esto?