Dayîkê Gebze: Heta masaya çareserî awan nêba ma tîya de yê 

2019-04-24 13:31:08


	 

	Safiye Alagaş

	 

	KOCAELÎ - Dayîkê ke wextê çalakîya nobeta verê Zindanê Gebzeyî de ameyî derbkerdene û destbendkerdene, dîyar kerdî ke ê do seb adomananê xo heme çî bikerê. Dayîkan dîyar kerdî heta ke çalakîyê grevî dewam bikerê do çalakîyê înan zî dewam bikerê û vatî: "Wa masayêke çaraserî  ê heme partî ci de yê awan bikerê. Ma dayîk ê. Êdî bes o."

	 

	Keyeyê hepsîyan ke grevê vêşanîye de yê 9ê Nîsane de verê Zindanê Tîpê M yê Gebzeyî de çalakîya nobete dayî destpêkerdene û dewam kenê. Dayîkê ke emrê înan mabêne 50 û 70ê Mêrdîn, Nîgde, Riha û Erzirom ra şî Gebze û seba domananê xo bidê cuyayîş xo ver danê.

	 

	Dayîka hepsîyê bi nameyê Alî Îlhan Bayer û Ruşen Bayer, Zeynep Bayere ke roja ewil ra grev de yê û ê zî bi rojan o yenê destbendkerdene û erd ra yenê kaşkerdene. Zeynebe wina va: "Ez amade ya seba domananê xo her çî bikerî. Ez do çalakîya xo dewam bikerî. Şansêke mi bîn çin o. Yan do aştî bêra yan zî ma do kuçeyan de xo ver bidê."

	 

	'Ma nêwazenê cenazeyî zindanan ra vejîyê' 

	 

	Hanîfe Bayera ke seba domananê xo çalakîye de ya wina va: "Ma seba înan tîya de yê. Yewin waştişê ma edalet o. Polîsî ameyî ma erd ra kaş kerdî, ma bi zor destbend kerdî. Talîmatan danê înan. Polîsî zî wina kenê. Ma wazenê waştişê domananê ma bêrê qebulkerdene. Ma nêwazenê zindanan ra tabut vejîyê."

	 

	'Ez do mîyanê çalakîyan de bî'

	 

	Cemîle Çîftçî ke waya hepsîyê bi nameyê Selîm Çîftçî ya û 23 serrî yo birayê aye zindan de yo bale ante hêrişê polîsan ser û wina va: "Ma ra vanê tîya ra şêrê. Ma zî vanê ma nêşinê. Ma kaş kenê û tepişnenê. Birayê mi 23 serrî yo tepişnaye yo. Ma vanê wşatişê înan qebul bikerê. Heta grevê înan dewam bikero ma do zî çalakîya xo dewam bikerê."

	 

	'La ma domananê xo ra tewr girîng ê?'

	 

	Fehîme Ekmeza zî da zanayîş ke ê seba waştişê hepsîyan bîyarê ziwan, çalakîye kenê û wina va: "Ma erd ra kaş kenê. Destê mi masayî. Wextê destbendkerdene de vatî, ti çira ameya tîya? Mi zî va heta ke lajê mi grev de bo ez tîya ra nêşina. Biewnê ez nika tepişnaye ya la şima mi serbest vera bidê ez do reyna şêrî Zindanê Gebzeyî.”

	 

	Dayîka hepsîyê bi nameyê Îsmet Taşî, Hazal Taşe zî arde ziwan ke heta domanê înan grev de bê, ê do zî verê zindanî de nê dejî biancê û va ganî seba domananê înan çareyêke bivînê.

	 

	Dayîka Ozlem Soylere, Hatîce Soylere zî wina va: "Ma her roj seba bêrê verê zindanî ma kewenê rayîr. Hema ma nêresenê uca polîsî dorê ma gênê.  TOMA, polîs û leşker dorê ma gênê. Ma zî nişnenê ro û çalakîya roniştişî kenê. Ma dayîk ê, êdî bes o. Wa  her kes destê xo bikero binê sî."