Rojnamegerê cinî: Ma 22 Nîsane dîyarîyê Kîbrîye Evrene kenê 

2019-04-21 15:21:58


	 

	Rengîn Azîzoglu

	 

	AMED - Rojnamegerê cinî dîyar kerdî ke pêwa çapemenîya Kurdî prosesê zehmet ra derbaz bena, her ke şîya xo aver berda û vatî: "Têkoşînê Kîbriye Evrene, nîşaneyê têkoşînê rojnamegerê cinî yê her warî de ramojnena ya. Ma zî sey rojnamegerê cinî 22ê Nîsane Roja Rojnamegerîya Kurdî dîyarî Kîbriye Evrene kenê."

	 

	22ê Nîsana 1898an de hetê ke kesê keyeyê Bedirxanîyan Mîkdat Mîthat Bedirxanî ra paytextê Misirî yê Qahîre de yewin rojnemeyê Kurdî yê bi nameyê "Kurdistan" ame çapkerdiş. Şarê Kurd a roje sey roja Rojnemegerîya Kurdî pîroz kenê. Seba tedayê dewlete rojname mecbur mend ke mabêne Misir-Swêd û Îngîlîstanî de bêro weşênayîş. Dimayê hûmara yewin ra dewleta Osmanî qedexe kerd. Mîkdat Mîthat Bedirxanî mecbur mend ke rojname cayêke bîn de vejo. Bajarê Ewropa yê sey Cenevre, London, Folkston 3 hûmarê vernî yê rojnameya Kurdî ameyî weşênayîş. 31 hûmaran ra 2 heb hema vindî yê. Her hûmara ci nêzdîyê 2 hezarî ameyî çapkerdene.

	 

	Rojnamegerê Kurd vera tedayan têkoşînê xo meşnayî. Heta ewro xeylê rojname ameyî vetiş. Sazgehê ke ameyê akerdiş, ameyê padayîş. La bi pêro astengîyan ameyî vetiş, rojname û televîzyonê kurdî bi hawayêke bi hêz rayîrê xo meşne"

	 

	'Na roje rojnamegeran keno kelecan'

	 

	Endama Platformê Rojnamegerê Cinîyan ê Mezopotamyayî Fatîme Tekîne da zanayîş ke pêwa adetê Çapemenîya Kurd sewîyeya zehmet ra derbaz bîyê zî, her ke şîyo xurt bîyo û va: "Pêwa qedexekerdişî heta ewro ameyo yo. Çiqas bi zehmetî dewam bikero zî ewro hema serê lingan de yo. Ma 22ê Nîsane sey rojêke rojnamegerê Kurdan keno kelecan vînenê. Rojnamegerê cinî dimayê Gurbetellî Ersoze aver şîyê. Cinîyê rojnameger yê Kurdî wextê tewr xidar de meslekê xo dewam kerdê."

	 

	Fatîmeye dewamê qiseykerdişê xo de va ke bi seyan rojnameger nika tepişnayeyê û va nîmeyê înan zî cinî yê. Fatîmeye wina va: "Îqtîdar cinîyan ra terseno. Pêwa heme tedayan ajansê xeberan ê cinîyan estê. Ûca de bi desan embazê ma yê cinî estê. Jinnews, Jin Tv xebatê ke ma eşeknê pişta xo bidê û vengê xo bi hewayêke azad bidê eşnawitişî yo. Embaza ma Kîbrîye Evrene wextêke derg o grev de ya. Ma bi xemgînî kewenê 22ê Nîsane. La hêzê ma esto. Bawerîya ma bi cinîyan esta. Ez 22ê Nîsane heme embazan pîroz kena."

	 

	'Ma do berpirsyarîya xo bi ca bîyarê'

	 

	Muxabira Jinnewsî, Gulîstan Azake zî dîyar kerde ke prosesêke herêm de xebatê rojnamegerî suc yenê hesibnayîş. Bi taybet cinî hedef yenê girewtene û va pêwa pêro tedayê îqtîdarî, rojnamegerê cinî yê bi adetê çapemenîya azad resayî, têkoşîn de rolê rayber kay kenê û serewedartiş berz kenê. Gulîstane wina va: "Rayberîya têkoşînî warê çapemenî de yena meşnayîş Gurbetellî Ersoz a. Gurbetellî wextê tewr  zehmet ê rojnamegerîyê, Rojnameyê Ozgur Gundemî de xebityeya û sere nêtewênaya. Ma taqîbkerdoxê nê adetî yê. Vera zulmî sere nêdê ro û berpirsyarîyê xo bi ca bîyarê."

	 

	'Ma 22 Nîsane dîyarîye Kîbrîye Evrene kenê'

	 

	Rojanemger Nurcan Yalçine zî arde ziwan ke çapemenîya Kurd tarîxê xo yê 121 serrî de vera teda, pelçiqnayîş, qetilkerdiş û bombardumankerdiş fek têkoşînê xo ra vera nêdayê û wina va: "Ma sey adetê çapemenîya azad, beyraqe Gurbetellî, Denîz Firat, Nujiyanan girewt û bi sozê ke bi hewayêke tewr baş girewt û vejîyayî rayîr. Ma sey rojnamegerê cinî tîya ra tepya do rastîyan neql bikerê. Nika hepisxaneyan de grev esto. Embaza ma Kîbrîye 120 rojî yo grev de ya. Têkoşînê aye nîşaneyê rojnamegerê cinîyan ê ware de danê ya. Ma rojnamegerê cinî 22ê Nîsane dîyarîyê Kîbriye Evrene kenê."