'Şima mergî xo ra berpirsîyarê' 

2019-04-20 09:37:18


	 

	Gulîstan Azak

	 

	AMED - Dewijê Goksu dîyar kerdî ke seba vîyerê binî ameyo qedexekerdene, asayîşê ganê înan çin o û dîyar kerdî ke selahîyetdarê ke înan muracat kerdo, înan ra vatê 'Mergê xo ra şima berpirsîyarê.'

	 

	Seba asayîşî xeylê dewan de vîyerê binî ameyê qedexekerdene û dewijê ke citkarî û pesdewarî dir eleqedar benê kewenê zehmetî. Dewa Goksu ya Bismilî ya Amedî seba ke verê rayîrê bejayî ra derbaz beno, erd û mêrgê şarî hetêke û keyeyê înan zî hetêke mendo. Vîyerê binî ke amebi viraştiş zî ameyo qedexekerdiş û dewijî seba trafîkê zêde nêeşkenê heywananê xo derbazê kîşte bîn bikerê. Dewijan dîyar kerdî ke ê mecburê pesê xo rayîr ra derbaz bikerê û va domanê înan her roje bi rîskê qeza dir yenê rî bi rî. Dewijan da zanayîş ke endîşeyê xo selahîyetdaran ra vatê, selahîyetdaran zî vato ke 'merdişan ra şim aberpirsîyarê.'

	 

	'Gelo ma do bi perayene şêrê kîşte bîne'

	 

	Ulmîye Sîncare va pêwa wesayît bi lezgînî derbaz benê, mecburê rayîr derbaz bikerê û va: "Ma merdişan ra bi endîşeyîn ê. Wa vîyero bin lezgînî akerê. Roje 5-6 rey ma derbaz benê. Domanê ma mecbur manenê ke derbaz bibê. Rayîr bi di şerîdan ra ameyo meydan. Wesayîtê ke şinê Amed nukteya înan ê vindertişî vera rayîrî yo."

	 

	Merdişan ra dewijî berpirsîyarê!

	 

	Mehmet Halîm Demîrî zî dîyar kerd ke hetê cendermeyan ra vîyero bin, bi sebebê asayîşî ameyo padayîş û va: "Seba çareserîya rewşa ma muracatê heme cayan kerd. La ma tu cewab nêgirewt. Na dewe bi pesdewarî yena zaneyene. Seba vîyerê binî çin o, ma nêeşkenê heywenan berê merg. Tewr tay hezar pesê ma estê. 5 dewarê ma estê. Wexto ke heywanê dewe bêrê fikrnayîş, na hûmare zaf zêde ya. Selahîyetdarê ke muracat kenê ma ra vanê, 'merdişan ra şima berpirsîyarê.' Yanî dewij û heywanî qezayêke de bimrê, berpirsîyar reyna dewij ê."

	 

	'Ma nêeşkenê şêrê wendegeh'

	 

	Domanê dewe zî wina vatî: "Ma her roje mecbur manenê, derbazê hetê bîn rayîrî bibê. Ma zaf zehmetîyan ancenê. Ma tersenê. Wa ganî çareserîyêke bêro vînayene. Reyke maye mi wexto ke ma derbaz bîne kewte. Ez zaf tersa ya ke wesayît bigino aye ro. Ma rewşê wina nêwazenê bêrê ciwîyene."

	 

	Asya Tosune zî reaksîyon ramojna û arde ziwan ke gelo dewlete vana qey kes tîya nêciwîyeno û va nê caardişî dewijan acis kerdo.

	 

	Fevzîye Yildize zî şîrove kerde û arde ziwan ke ganî nê qedexeyî bêrê wedartene yan zî do cuya dewe bêro vindartene.