‘Ma xover danî, şima zî xover bidêne’  

2019-04-19 13:25:46


	 

	ÎZMÎR - Hepsîyanê Zîndanê Cinîyan yê Şakranî ke 1ê Adare ra nata grevê vêşanîye de yî ra Esma Ayaze daye zanayene ke hemverê heme zextanê îdareya zîndanî de moralê heme hepsîyan baş o û wina va: “Ma bawerê ke serkewtiş yê ma yo. Heta ke ma serkewtiş nêgirî dest, ma fek çalakîya xo ra vera nêdanî. Netîce çi beno wa bibo, ma do ser bikewî. Ma bawer kenî, şima zî bawer bikerêne.”

	 

	Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş 163. rojan xo dima vera daye. Badê Leylaye 16ê Kanûne de xeylê zîndanan de grevê vêşanîye dîyayî dest pêkedene û 1ê Adare de zî çalakî vilayê heme zîndananê herêm û Tirkîye bîye.

	 

	Hepsîya bi nameyê Esma Ayaze Zîndanê Cinîyan yê Şakranî yê Îzmîrî de 1ê Adare ra nata grevê vêşanîye de ya. Esmaye bi rayîrê keyeyê xo mesaj erşawite û daye zanayene ke her çiqas ke zextê îdareya zîndanî hepsîyan ser de bibo zî moralê heme hepsîyan baş o.

	 

	'Serkewtiş do yê ma bo'

	 

	Esmaye mesajê xo de wina va: “Rewşa kesê ke grûba yewin de ca gênî xeylê xirab bîya. Ma bi 3 grûban kewtî grevê vêşanîye. No grev bi moral û xoverdayîşêko gird dewam keno. Embazanê ma ra tayê înan xeylê kîlo dayî. hewteyanê peynî de dejê mi yê sere û made zêdîyayî. Vîşêrê înan moralê mi baş o. Ma bawerê ke serkewtiş yê ma yo. Heta ke ma serkewtiş nêgirî dest, ma fek çalakîya xo ra vera nêdanî. Netîce çi beno wa bibo, ma do ser bikewî. Ma bawer kenî, şima zî bawer bikerêne. Heta ke tecrîd nêwedarîyo, ma gamêk apey nêerzenî. Ma Leyla Guven û Nasir Yagizî rê silaman erşawenî. Ma heme xoverdekaran silam kenî. Di rojan de reyêk erzenî qawişê ma ser û cigêrayîşan kenî. Televîzyonê ma zî girewtî. Rojname û swb ti çîyan nêdanî ma. la seba ma problem nîyo. Ma do heta peynî xover bidî.”