Hemşaredarê Baykan û Misircî: Ma do şarî dir îdare bikerê 

2019-04-15 14:13:12


	 

	SÊRT - Hemşaredarê Baykan û Misircî, seba heme kesê ke veng dayê HDPyî sipas kerdî û wina vatî: "Şar hetê heqîqetî vindert û vengê xo de HDPyî. Ma do zî şarî dir îdare bikerê û şarî dir berardiş bikerî. No serkewtiş ê ma yo."

	 

	Weçînayîşê herêmî yê 31ê Adare de qezaya Baykanî yê Sêrtî de HDPyî sera 27,74 rayan girewt û qezaya Misircî de zî HDPyî sera 50,08 rayan girewt û serkewte bi. Hemşaredarê ke mazbatayê xo girewtî û dest bi wezîfe kerdî, netîceyê weçînayîşî şîrove kerdî û şarî rê sipas kerdî.

	 

	Şaredarî ê şarî yê

	 

	Şaredara Baykanî Ozden Gulmeze dîyar kerde ke prosesê weçînayîşî de bi şew û roj xebityayê û wina va: "Pêwa pêro tedayê îqtîdarî ma şaredarîya Sêrtî girewt. Şarî vera tedayan verê HDPyî de ca girewt û tercîhê xo hetê HDPyî de kerdî. Ma zî lebate kenê ke erjê nê bê û çi destê ma ra bêro ma do bikerê. Ma do şarê xo dir xebatê xo bimeşnê. Şaredarî ê şarî yê. Berê şaredarî hemine rê akerde yo. Ma heme kesê ke ma rê piştdayîş dayî rê sipas kenê."

	 

	'Misirc ê ma yo'

	 

	Hemşaredara Misircî Esmer Barane zî seba heme kesê ke vengê xo dayê înan sipas kerde û va şarî HDPyî tercîh kerdo. Esmere arde ziwan ke destê AKPyî ra girewtişê şaredarî serkewtişêke pîl o û wina va: "Şaredarî 2014an de kewtebî destê AKPyî. Qayûm çinbi. Şar gerrekerdox bi. Xizmet çinbi. Ma 31ê Adare de sera 50,08 rayî girewtî. Vejya meydan ke AKP xizmet de xeylê qels o. Ma şarê xo rê spas kenê. Misirc ê ma yo. Sêrt ê ma yo. Serkeftîn ê ma yo."