Amadekarîya koçeran ya zozanan dest pêkerde 

2019-04-15 13:28:15


	 

	ŞIRNEX - Keser Dayane dîyar kerde ke bi germbîyayîşê hewa dir dest bi amadekarîyê zozanan kerdê û dîyar kerde ke emsar xeylê wareyî qedexe bîyê, êdî cayê heywanan ke biçerê kêm bîyê û çimeyê koyan ra feyde êdî nêeşkenê bigîrê.

	 

	Koçerê ke bendeyî germbîyayîşê hewa bî, nika dest bi amadekarîyê zozanan kerdî. Koçerê aşma gulane û hezîranî de yenê têhet û kewenê serê rayîrê Feraşînî û rayîrwanîya înan bi rojan dewam kena. Koçerê ke emsar xeylê wareyî înan ameyî qedexekerdene, emsar zî eynî endîşeyan cuyenê.

	 

	Cinîya bi nameyê Keser Dayane ke zimistanî qeraxê koyê Gabarî de derbaz kerde wina va: "Ma seba zimistanî ameyî tîya. Ma bi keyeyî ûca de mendî. Hem verê awe de yo, hem zî heywanê ma çerenê. Keyeyê bîn zî tîya manenê. Ma zimistanî tîya de manenê."

	 

	'Amadekarîyan dest pêkerdî'

	 

	Kesere da zanayîş ke seba vejîyê zozanan dest bi amadekarîyan kerdê û wina va: "Ma heywan û werdê xo kom kerdî. Heywanê ma do vernê de şêrê. Ma do çadir û hacetanê xo kom bikerî. Serra vîyarte de leşkeran nêverdayne ma şêrê. La ma xeylê kesî bi seyan heywanan dir şî çîyêk nêvatî. Ma ûca de heywananê xo wey kenê. Ma do emsar zî şêrê. Ma bi endîşeyîn ê ke do reyna vajê qedexe yo. Êdî wareyê ke ma heywanê xo berê zaf kêm bîyê. Ma çimeyan ra nêeşkenê feyde bigîrê."