Rîze de rewşa hepsîyê ke grev de yê giran bî 

2019-04-05 13:59:26


	 

	MÊRDÎN - Merdimê hepsîyan Nure Terlaka dîyar kerde ke rewşa hepsîyê Tîpê L yê Kalkanderî yê Rîze de grev de yê giran bîya û wina va: "Xêrcê ma kes seba domananê ma çîyêke nêkeno. Ganî ma pîya wirzê serê lingan."

	 

	Grevê vêşanîye ke bi amancê protestokerdişê tecrîdê Rayberê PKKyî Abdullah Ocalanî ser zindanan ameyî destpêkerdiş dewam kenê. Zindanê Tîpê L yê Kalkanderî yê Rîze ke 60 ra zêde hepsî grev de yê, ame zanayîş ke hîn înan ra gonî virêjenê û çimê înan êdî tarî beno. Nure Terlake da zanayîş ke lajê aye qiseykerdişê peyîn de dîyar kerdo ke rewşa hîn hepsîyan giran bîya û veng da ke ganî heme dayîkê Kurdan wirzê serê lingan.

	 

	'Ganî ma pîya wirzê serê lingan'

	 

	Nure da zanayîş ke lajê aye Velat Terlak 1ê Adare de grev de yo û wina va: "Vernê de ma nêzana grev de yo. dimayê heme hepsî kewtî grev ey zî va ez tede ya. Ez sey dayîkêke hepsî veng dana heme dayîkê Kurdan. Ma çira wina bêveng ê? Çira ma çimê xo padayê, çira ma ker bîyê? Ma ewro nêwirzê serê lingan do kam domananê ma rê se bikero? Ma dewletan rê verdenê la kes çîyêke nêkeno. Ganî dayîkî wirzê serê lingan."

	 

	'Hepsî gonî virêjenê û çimê înan êdî tarî benê'

	 

	Nure da zanayîş ke seba domananê înan çi destê înan ra bêro ganî bikerê û wina va: "Rewşa hepsîyan roj bi roje giran bena. Ma şêrê verê zindanan û çi lazim bo ma bikerê. Domanê ma zindanan de her roje nêzdîyê mergî benê. Ez veng dana heme dayîkan. Wa wirzê serê lingan. Ne wijdan ne zî însaf mendo. Şarêke nika vera nêweşîyan têkoşîn keno. Ma şan de nêkewenê ra. Ganî ma seba domananê xo êdî çîyêke bikerê."

	 

	Nure tewr peyîn qiseykerdişê xo de arde ziwan ke lajê aye dîyar kerdo ke se beno wa bibo heta tecrîd nêwirzo do grevê xo dewam bikerê û wina va: "Ma zî pey waştişê înan de yê. Rewşa hîn hepsîyan giran o. Lajê mi va hîn hepsî gonî rişnenê û çimê înan êdî tarî benê."