Pervîn Buldane: Ez do şîyayîşe qayûman Amed ra temaşe bikera  

2019-03-31 13:30:50


	 

	STENBOL - Hemsereka Pêroyî ya HDPyî Pervîn Buldane Bakirkoy de raya xo şuxulnaye. Pervîne ard ziwan ke a do uca ra derbazê Amedî biba û va: “Ez do şîyayîşê qayûman Amed ra temaşe bikera.”

	 

	Hemsereka Pêroyî ya HDPyî Pervîn Buldane Bakirkoy ê Îstanbulî de, Dibistana Murat Kolukî de raya xo şuxulnaye û va: “Mi nika raya xo şuxulnaye. Ez do rastarast şora Amed. Ez do şîyayîşê qayûman Amed ra temaşe bikera.”

	 

	Raydayîş ra dima Pervîne verê dibistane de eşkerayîya kilme daye çapemenîye. Pervîne va: “Ma prosesêko xebatanê giranan xo pey de verda. Eslê ci de ma her çî kerd. Seba ameyoxê Tirkîya, seba sibayê Tirkîya ma xeylî çîyî vatî. Labelê tewr kanalê televîzyonêk zî ca nêda xebatanê ma û na mana de astengî zaf bîyî. Beno ke na mana de şarê ma zaf heşarê têhetameyîşanê ma nêbîyo. Labelê ez wazena vaja ke ma zaf gurîyayî. Ma hertim wareyanê mîtîngan ra şarê xo ra zaf çîyî vatî. Ma ewro wezîfeyê xo ard ca. Ez bawer kena ewro şarê ma zî sindoqan de wezîfeyê xo do bîyaro ca. Mi nika raya xo şuxulnaye. Ez do rastarast şora Amed. Ez do şîyayîşê qayûman Amed ra temaşe bikera.”