Çalakîya Leyla Guvene roja 141ine de dewam kena  

2019-03-28 15:24:34


	 

	AMED - Çalakîya grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 141ine de dewam kena.    

	 

	Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 141ine de dewam kena. Leylaye ke 25ê Çele de serbest ameye veradayene keyeyê xo de çalakîya xo dewam kena. Serdayîşê seba Leylaye dewam kenê û ablûqayê polîsan verê keyeyê aye zî hîna dewam keno.

	 

	Dimayê Leylaye bi eynî waştişî Mintiqaya Federalê Kurdistanî çalakîya Temsîlkarê HDPyî Nasir Yagizî roja 128an de, Strasbourgî de 14 kes û Gallerî de zî Îmam Şîşî roja 102 de dewam keno. Endama Meclîsê Îştarî Fadîle Toke roja 68ine de ya. Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 72in de yê û bajarê Toronto ê Kanadayî de zî çalakîya Yusuf Îba ke dayo destpêkerdene roja 75 de dewam keno. Heto bîn ra çalakîya hepsîyê ke grevê vêşanîye ê koma yewine roja 102ine de û çalakîya hepsîyan 1ê Adare ra dima heme zindanan de vila bî.   

	 

	Awanîya HDPyî bajarî de çalakîya grevê vêşanîye ya parlamenteran dewam kena. Çalakîya ke parlamentera HDPyî Dêrsim Dag 3yê Adare de da destpêkerdene û Parlamenterê Wanî Tayîp Temel û Murat Sarisaç ke 8ê Adare de dest pêkerdî zî dewam kenê.

	 

	Kesê ke ameyî tahlîyekerdene keye de çalakîya xo dewam kenê  

	 

	Sedat Akino ke zindanê Erzîcanî Tîpê T de dest bi grev kerdib dimayê ke ame tahlîyekerdiş çalakîya xo keye de roja 81ine de dewam keno. Gurbet Ektirena ke 15ê çelî de dest bi çalakîya grevî kerde û amî tahlîyekerdene zî 8ê Adare de çalakîya xo keye de Dêrikê Mêrdînî de dewam kena û roja 72ine grevê vêşanîye de ya. Îhsan Sînmîşo ke 1ê Adare de dest bi grev kerdib û 11ê Adare de Zindanê Sîlîvrî de tehlîye bi, keyeyê xo yê Kuçukçekmeceyê Stenbolî de grevê xo dewam keno. Ferdî Karabayo ke 1ê Adare de dest bi grev kerdib zî 22ê Adare de Zindanê Tîpê F yê Bûcayê Kiriklarî tahlîye bi û keyeyê xo de grevê vêşanîye dewam keno.

	 

	Zindanê Tîpê T yê Cinîyan ê Oltuyî Erzirûmî de hepsîya bi nameyê Zehra Saglam, Zindanê Tekîrdagî yê Tîpê F yê Hûmara 2 Zulkuf Gezen, Zindanê Cinîyan ê Gebzeyî Ayten Becet û Zindanê Tîpê E yê Mêrdînî de Medya Çinare vera tecrîdê hemverê Rayberê PKKî Abdullah Ocalanî çalakî kerdî û peynîya cuya xo ardî.