Namzeda Çewlîgî Senem Çakas: Cinî bivuryê do keye û komel zî bivuryê 

2019-03-27 14:05:38


	 

	Şehrîban Aslan

	 

	ÇEWLÎG - Namzeda HDPyî ya Çewlîgî Senem Çakase dîyar kerde ke eke bêro weçînayene seba cinîyan projeyê înan estê û wina va: "Ma wazenê sînoran wedarnê. Ma do nê zî dest bidê yewbînan û bikerê. Eke cinî bivuryo, do keye bivuryo, do komel bivuryo."

	 

	Çewlîg de sere de HDP û eynî wextî de AKP, CHP, MHP, Saadet Partî, BTP û BBP seba weçînayîşan xo amade kenê. Namzedê hemşaredarîya Çewlîgî Senem Çakas û Hişyar Ozsoy ê.

	 

	Senem 1988an de Dara hênê yê Çewlîgî de ameya dinya û beşêke pîl ê cuya xo Edeneyî de derbaz kerda. Unîversîteya Mustafa Kemalî ya Hatayî Beşê Îşletme ya Fakulteya Zanistê Îdarî û Îktîsadî qedêna. Yewîneyê Karê Îdarî yê fîrmayêke mîyanneteweyî yê Edeneyî de sey pispor xebitya. 2014an de Edene û Çewlîg de Kongreya Îslamî ya Demokratîk (DÎK)  û Meclîsê cinîyan de ca girewte.

	 

	'HDP erje dano cinîyan'

	 

	Seneme arde ziwan ke aye seba xeta mor ê HDPyî bîya namzed û va seba şarpa sereyê aye zaf problem cuyaya û va: "Ez Çewlîg de pîl bîya. Mi wendegehê mîyanên û lîse Edene de temam kerd. Unîversîte Hatay de qedêna. Ez kewta îmtîhanan. Îmtîhanê nuşte mi derbaz kerd la mulakat mi derbaz nêkerd.  Ez zewicyaya û ameya Çewlîg. Yew kêna mi esta. HDP erje dano cinîyan. Coka mi HDP tercih kerd. Girîngî dano cinîyan. Seba xurtbîyayîşê cinîyan vernî akeno. Sebebê tercîhê mi no bi."

	 

	'Ma do seba cinîyan wareyê îstîhdamî awan bikerê'

	 

	Seneme da zanayîş ke rewşa ke bêrê weçînayîş, vernê de do seba cinîyan wareyê îstîhdamî awan bikerê û va Çewlîg de keye û derûdor cinîyan xeylê verê înan danê wareyê îstîmlakî û va: "Ganî cinî tena warê îstîmlakî de ney, her ware de bêrê vînayene. Goreyê şîrtîqerîya înan wareyê îstîhdamî bêrê awankerdene ke ê zî ca bigîrê. Hedefê ma no yo. Ma nêwazenê cinî atolyeyê konfeksiyon, merkezê vengdayîş û reyonê marketan de heps bimanê. Nika Sûka Kede ya Cinîyan esta la uca çar dêsî ya. Seba uca butçeyêke baş nêameya visnayene. Ma do girêdayê mudirîyê polîtîkayê cinîyan, baskê projeyê cinîyan awan bikerê."

	 

	'Cinî zaf probleman cuyenê'

	 

	Seneme da zanayîş ke problemê tewr pîl ê Çewlîgî kulturê qewexane yo û va: "Camêrdî seba betalî şinê qewexaneyan. Hamnan û wisar nê qewexaneyî heta peyerayîr şinê. Cinî nêeşkenê uca ra derbaz bibê. Çewlîg de cinîyê wayîrê domanan reyan seba ke qertê înan çin o otobuse ra yenê vetiş. Îmkanê pêro kesan sey yewbînan nîyo. 4 serrî yo ez Çewlîg de cuyena. Keyeyê şînî ê cinîyan çin o. Ma plan kenê ke bajar de 5 heb keyeyê şînî viraznê. Goreyê lazimîyê cinîyan ma do viraznê. Cinî nêwazenê hepsê keyeyî bibê. Kedkarê ma yê tewr pîl cinîyê ke keye de kar kenê yê. Betilbîyayîşê înan çin a, mabênêke înan çin a, sîgorteyê înan çin a. Cinî eşkenê sîyaset bikerê, eşkenê bixebityê. Eke cinî bivuryo keye vuryeno, keye bivuryo komel vuryeno."