Dayîka Suheyla Taşe ke grevê vêşanîye de ya: Wa zindanan ra tabutêke bîn nêvejîyo 

2019-03-21 09:08:46


	 

	ENQERE - Suheyla Taşe ke zindanê Cinîyan ê Sîncanî de bi 86 rojî grevê vêşanîye de ya. Dayîka aye Nezahat Taşe da zanayîş ke seba grev bi peynî bê ganî waştişê înan bê ca bêrê û wina va: "Zindanan ra tabutêke vejîya. Wa ê bîn nêvejîyê. Êdî bes o. Wa veng bidê vengê domananê ma."

	 

	Çalakîya Grevê vêşanîya ya hemsereka KCD û parlamentera HDPyî ya Colemêrgî Leyla Guvene ke bi amancê wedartişê tecrîdê Rayberê PKKyî Abdullah Ocalanî ser dabî destpêkerdiş roja 134in de dewam kena. Çalakîya koma vernî bi eynî waştişan amîbî destpêkerdene zî kewte roja 96an. Temsîlkarê HDPyî ê Hewlêrî Nasir Yagiz kewt roja 121in, ê 14 çalakgerê Strasbourgî kewt roja 95, ê Îmam Şîşî ke Gallerî de dabi destpêkerdene kewt roja 95in, Fadîle Toka ke Mexmur de da destpêkerdene roja 61in, hemsereka DBPî Sebahat Tuncel û parlamentera HDPyî ya verê ê Colemêrgî Selma Irmake kewt roja 65in.

	 

	3ê Adare û 8ê Adare de zî mîyan de parlamenterê HDPyî Dersîm Dag, Tayyîp Temel, Murat Sarisaç zî estê komêke awanîya HDPyî ya Amedî de kewtî grev.

	 

	'Grev de bi israr bî'

	 

	Zindanê Cinîyan ê Sîncanî, 26ê Kanûne de Sariye Taşkesen, Zelîha Ustabaş û Suheyla Taşe kewtî grev û roja  86in de grevê xo dewam kenê. Dayîka Suheylaye, Nezahat Taşe va grevê înan ameyo sewîyeyêke krîtîk û veng da raya pêroyî û wina va: "Ma zanê baş nîyê, la wexto ke ma şinê moralê înan zaf berz o. Ê moral danê ma. Verê grevî ez reyna şîya pêvînayîş. Vatî do vera tecrîdî bikewê grev. Wexto ke mi eşnawit ez vera nê vejîyaya. La aye bi qerar bî. Ma vera qerarê aye rêzdar ê."

	 

	'Ma nêwazenê tabutêke bîn zî zere ra vejîyo'

	 

	Nezahate dewam de da zanayîş ke seba grev peynî bibê ganî waştişê înan bi ca bêrê û wina va: "Tena kênaya mi nêkewta grev. Heme kesê uca domanê min ê. Ganî no grev peynî bibo. Hesire dayîkan êdî nêmendê. Wa dewlete vengê dayîkan bieşnawo. Wa tabutêke bîn zî zindan ra nêvejîyo. Wexto ke ez şina zindan kêna mi rîpêşna daya verê fekê xo. Wexto ke wina vînena kezebe mi veşana. Seba dayîkan domanê înan cîya yê. Zerrîya pêrune veşana. Wa peynî bîyarê. Suheyla pêvînayîş de dîyar kerde ke heta tecrîd peynî nêbo do grev dewam bikero."

	 

	Nezahate arde ziwan ke vîtamînê B1 ke bi îmkanê xo ardê zî îdarekarê zindanî nêgirewto zere û wina va: "Pîyê aye vîtamînê B1 vîna û ard. La nêgirewtî zere. Ma da avûkatan înan rê zî nêverdayê. Vatî wezaretê dade nêverdeno. Ma wazenê vîtamînan bidê domananê ma."

	 

	12 serrî û 9 aşmî ceza

	 

	Suheyla bi eslê xo Colemêrgî ra ya û 12 serrî ya xo de keyeyê aye koçê Enqere keno. Dimayê ke Afyon de unîversîte wende, beşdarê xebatê ciwanan bî û 2017an de Amed de amî destbendkerdene. Bi îdiayê ‘endamîya rêxistine’ 12 serrî û 9 aşmî ceza aye rê amî birnayene û dosya aye hîna Dadgerî de ya. Suheyla 26ê Kanûne de kewte grev.