Xoverdayîşê Leyla Guvene roja 133ine de dewam keno  

2019-03-20 14:43:24


	 

	AMED - Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî dest pêkerdiş roja 133ine de dewam keno.

	 

	Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 133ine de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Serdayîşê seba Leylaye dewam kenê û ablûqayê polîsan verê keyeyê aye zî hîna dewam keno. dimayê Leylaye bi eynî waştişî Mintiqaya Federalê Kurdistanî çalakîya Temsîlkarê HDPyî Nasir Yagizî roja 120an de, Strasbourgî de 14 kes û Gallerî de zî Îmam Şîşî roja 94 de dewam keno. Endama Meclîsê Îştarî Fadîle Toke roja 60ine de ya. Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 64in de yê û bajarê Toronto ê Kanadayî de zî çalakîya Yusuf Îba ke dayo destpêkerdene roja 67an de dewam keno. Heto bîn ra çalakîya hepsîyê ke grevê vêşanîye ê koma yewine roja 94ine de û çalakîya hepsîyan 1ê Adare ra dima heme zindanan de vila bî.

	 

	Awanîya HDPî ya bajarî de çalakîya nobetî amî destpêkerdene

	 

	Çalakîya ke parlamentera HDPyî Dêrsim Dag 3yê Adare de da destpêkerdene û Parlamenterê Wanî Tayîp Temel û Murat Sarisaç ke 8ê Adare de dest pêkerdî zî dewam kenê. Bi parlamenteran dir zî endamê partî ra Îsmet Yildiz, Sevîcan Yaşar, Salîh Tekîn û Bîlal Ozgezer dimayê eştişê awanî ser ameyî tepiştiş û dima ra zî ameyî tewqîfkerdiş, seba Salîh Cansever, Abdulhalik Kurt û Yusuf Ataş zî cezaya hepsê keyeyî ame dayene û çalakîya xo dewam kenê.

	 

	Eynî wextî de xeylê kes seba piştdayîşî bi çalakîya parlamenteran dir awanîya HDPyî ya Amedî de dest bi çalakîya nobetî ke do 2 rojan dewam bikerê kerdî.

	 

	Kesê ke ameyî tahlîyekerdene keye de çalakîya xo dewam kenê

	 

	Hepsîyan ra Sedat Akino ke Erzîcan de Tîpê T de dest bi grev kerdib dimayê ke ame tehliyekerdiş çalakiya xo keye de roja 73in de dewam keno. Gurbet Ektirena ke 15ê çele de dest bi çalakiya grev kerde û dima ra amî tahliyekerdiş zî 8ê Adare de çalakîya xo keyeyê xo Dêrikê Mêrdînî de dewam kena û roja 64in grevê vêşanîye de ya. Sema Akane zî 14ê Adare de amî tahliyekerdene û çalakîya aye keye de dewam kena roja 75ine de dewam kena.

	 

	Keyeyê Zulkuf Gezenî şî serdayîşê Leyla Guvene

	 

	Dayîk û pîyê Zulkuf Gezeno ke zindanê Tekîrdagî hûmara 2yîn de vera tecrîdî çalakîya protestoyî kerd û cuya xo vindî kerd şî serdayîşê Leyla Guvene. Leyla keyeyê Zulkufî rê sersaxî waşt û va: "Ez zindan ra yena. Hîsê zindanî zaf cîya yê. Seba ke moralê embazanê ma yê zindanî baş bo ez xo ver dana. Mi nêzanayne ke do Zulkuf no baro giran bido. Ez qurban Zulkuf. Wa cayê to cenet bo Zulkuf.  To xoverdayîşê Mazlûm Doganî weçîna. Xoverdayîşê Mazlûm Doganî dimayê 40 serran kesayetê Zulkuf Gezenî de bi ca ame. Embaz Zulkuf  Mazlûm Doganî nê wextî yo."

	 

	Dayîka Zulkufe zî wina va: "Şima heme seba bi eynî kesê. Wa zerrîya tu dayîkêke nêveşîyo. Zulkuf verê şehadetê xo bi rayîrê telefonî ro ma geyra la ma fam nêkerd ke xatir ma ra wazeno. Zaf bi coş bi la ma nêzana ke coşê ey seba nê yo."