Cinî bi rengê xo seba Newroze xo amade kenê 

2019-03-20 12:58:33


	 

	COLEMÊRG - Cinêyê ke bi cil û belgê xo yê rengîn seba Newroze xo amade kenê, dîyar kerdî ke ganî her kes seba bibo vengê Leylaye vejîyê wareyê Newroze.

	 

	Colemêrg de cinî do bi rengê xo beşdarê wareyê Newroze bibê. Dayîkê Aştîye ya Colemêrgî Nesîbe Îhtîyatoglu da zanayîş ke ê do bi coşêke pîl Newroze pîroz bikerê û wina va: "Ma dayîkê Colemêrgî, ma cinîyê Colemêrgî do bi cil û belganê xo yê adetî aştîye biqîrê. Ma nêwazenê merdişê domananê xo temaşe bikerê. Ma wazenê azadî wareyê Newroze de pîya biqîrê. Newroze roşanê ma Kurdan a. Ez wazena her kes wayîrê Newroze vejîyo û wa na Newroze bibo azadîya şarê Kurd.”

	 

	'Leyla seba no welatî eşkena bibo berê aştîye'

	 

	Ayşe Ertuşa ke lajê aye 4 serrî yo zindan de yo, da zanayîş ke do wareyan de bê û wina va: "Ma wazenê wisar bibo wisarê aştî û azadîya domananê ma. Eke ma pîya wareyan de bê, ma bawer kenê ke do her çî weş bo. Ganî Newroze de ma cinî bibê vengê Leyla Guvene. Leyla eşkena seba no welatî bibo berê aştîye. Leylaye seba aştîye û yewîye bedenê xo daya meydan. Ma cinî piştdayîş danê aye. Ma heme embazanê ke xo ver danê selam kenê."

	 

	Cinîya bi nameyê Derya Kanpolate zî veng da heme cinîyan kerde ke beşdarê Newroze bibê û va: "Lazimîyê no welatî bi aştî, têduştî û hizur esto. Ganî heme cinî Newroze de wareyan de bê."